Стәрлетамаҡ ҡалаһының 5-се Көнбайыш микрорайонында 1225 урынға иҫәпләнгән дөйөм белем биреү мәктәбе әҙер тип әйтерлек. Мөһабәт бинаның Төҙөүселәр урамының ҡабатланмаҫ бер йәме буласағына шик юҡ.

— Күптән көтөп алынған мәктәп­тең ишектәре асылыу менән ҡала уҡыусыларының барыһы ла беренсе сменала уҡыу мөмкинлегенә эйә буласаҡ, — ти уҡыу йортоноң дирек­торы Оксана Самойлова. — “Баш­ҡортостандың 100 йыллығына — 100 объект” исемлегенә ингән заманса бинала бассейн, ике спорт залы, ашхана, медицина блогы, хәрәкәте сикләнгән уҡыусылар өсөн лифттар менән бергә һәр ҡатта янғын хәүефенән һаҡланыу зонаһы ла булдырылған. Ошондай үҙенсә­лекле кабинеттар, төтөндө ҡыуыу һәм һауа биреү кеүек саралар ҡа­ралған берҙән-бер мәктәп ул беҙҙә. Бинаның проекты ентекләп, төбөнә төшөп уйланылған. Уҡытыусылар ғына түгел, күрше-тирәлә йәшәгән уҡыу­сылар ҙа, ата-әсәләр ҙә мәктәптең ҡасан асылыуы менән ҡыҙыҡһына.


— Тантаналы көнгә күпме ваҡыт ҡалды?

— Яңы йылға аяҡ баҫҡас, әлбиттә. Әле бина эсен таҙартыу, йы­йыштырыу эше бара. Интерактив таҡта­лар ҡуйылды, кабинеттарҙы йыһаз­ландырыу дауам итә. Бөтә нәмә өр-яңы, класс бүлмәләре көлөп тора, коридорҙар иркен, зауыҡ менән матур төҫтәргә буялған. Һеҙҙең күңелегеҙгә лә хуш килгәндер, тип уйлайым.

Яңы мәктәпте һалыу эшен “10-сы төҙөлөш идаралығы” яуаплылығы сикләнгән йәмғиәте үҙ өҫтөнә алған. Төҙөүселәр балаларҙың хәүеф­һеҙлеген, именлеген хәстәрләп, йөҙ видеокамера урынлаштырған. Оксана Самойлованың әйтеүенсә, һөйөнөскә күрә, Стәрлетамаҡта демографик хәл яҡшыра бара, айырыуса уларҙың яңы мөһабәт мәктәбе урынлашҡан йәш микрорайонда. Һуңғы алты йылда тыуым һиҙелер­лек артҡан, тимәк, бала күңеленә яҡты нур һуҙыусы белем усағынан ҡыҙ һәм малайҙарҙың эҙе һыуын­маясаҡ.