Республика етәксеһе билдәле йәмәғәт эшмәкәре Гөлфиә Юнысованы юбилейы менән ҡотланы.

Өфөлә Башҡортостандың халыҡ шағирәһе Гөлфиә Юнысованың “Туҡтатмағыҙ юлдарымдан...” тип исемләнгән әҙәби-музыкаль кисәһе үтте. Күренекле йәмәғәт эшмәкәре, журналист, бихисап китап авторы Гөлфиә Аҙнағол ҡыҙын 70 йәшлек юбилейы менән республика Башлығы вазифаһын ваҡытлыса башҡарыусы Радий Хәбиров ҡотланы.

Башҡортостандың халыҡ шағирәһе, Рәсәйҙең һәм Башҡортостандың атҡаҙанған мәҙәниәт хеҙмәткәре, Һәҙиә Дәүләтшина һәм Мифтахетдин Аҡмулла исемендәге дәүләт премиялары лауреаты Гөлфиә Юнысова оҙаҡ йылдар “Башҡортостан ҡыҙы” журналының баш мөхәррире була, Рәсәй һәм Башҡортостан ҡытын-ҡыҙҙары ойошмаларының эшен ойоштороуҙа ла әүҙем ҡатнаша. Ул сәйәсмән булараҡ та танылыу алған шәхес: өс тапҡыр Өфө ҡала Советына, РСФСР-ҙың Юғары Советына, Дәүләт Йыйылышы – Ҡоролтайға депутат итеп һайлана. Шуғалыр ҙа сараға депутаттар ҙа, дәүләт эшмәкәрҙәре лә күп килгәйне. Дәүләт Думаһы депутаты Зөһрә Рәхмәтуллина, Дәүләт Йыйылышы – Ҡоролтай Рәйесе урынбаҫары Эльвира Айытҡолова, мәҙәниәт министры Әминә Шафиҡова, Өфө ҡала округы хакимиәте башлығы урынбаҫары Сынтимер Баязитов, Бөтә донъя башҡорттары ҡоролтайы Башҡарма комитеты рәйесе Әмир Ишемғолов, Башҡортостан Яҙыусылар союзы рәйесе, Дәүләт Йыйылышы – Ҡоролтай депутаты Зәки Әлибаев, шулай уҡ Гөлфиә Аҙнағол ҡыҙының яҡташтары, хеҙмәттәштәре, коллегалары сәхнә түренә сығып, йылы тәбрикләү һүҙҙәрен еткерҙе.

Юбилей кисәһенә ҡарата Зәйнәб Биишева исемендәге “Китап” нәшриәте “Туҡтатмағыҙ юлдарымдан...” тип исемләнгән шиғырҙар йыйынтығын сығарған. Был шағирәнең нәшриәттә баҫылған 35-се китабы.

Кисәлә актерҙар, йырсылар, ижади коллективтар һәм башҡа билдәле сәнғәт әһелдәре ҡатнашты. Улар шағирәнең һүҙҙәренә яҙылған йырҙарҙы башҡарҙы, шиғырҙарын уҡыны. Әйткәндәй, Гөлфиә Аҙнағол ҡыҙының шиғырҙарына 500-ҙән ашыу йыр яҙылған!

Быйыл шағирә бер генә юбилей датаһын билдәләмәй: әҙәби эшмәкәрлегенә – 50, журналистикаға килеүенә – 45, тормош иптәше, билдәле ғалим Мирас Иҙелбаев менән ғаилә ҡороуҙарына 50 йыл.

– Мин әле эшләйәсәкмен, пландарым күп! Шиғырҙар, әлбиттә, үҙенән-үҙе тыуа. Әле депутатлыҡ эшмәкәрлегем хаҡында яҙырға кәрәк, беҙ һынылыш осоронда эшләнек. Публицистик мәҡәләләр, республикабыҙҙың яҙыусылары, ижад кешеләре, билдәле шәхестәр менән әңгәмәләрҙән торған өс китап әҙерләнем, – ти тынғыһыҙ шағирә.