Һуңғы йылдарҙа республикала ауыл халҡының йәшәйешен яҡшыртыу буйынса төрлө программалар уңышлы эшләп килә. Улар араһынан “Урындағы башланғыстарға булышлыҡ итеү” проекты бигерәк тә ваҡытлы булды, сөнки ошо программа ярҙамында бихисап эште атҡарып сығыу өсөн мөмкинлектәр асылды.

Ғафури районының Үтәк ауылы халҡы дөйөм йыйылышта балалар майҙансығы өсөн тауыш биргәйне. Проект конкурста еңеп сыҡты һәм ауылы­быҙға йәм өҫтәп уйын майҙансығы барлыҡҡа килде.

Күптән түгел ауылдаштар дөйөм йыйылыш уҙғарып, артабан хәл итәһе мәсьәләләрҙе барланы. Көн тәртибендә мәҙәниәт йортоноң ҡыйығын яңыртыу һәм Тәңребәк ҡойоһон төҙөкләндереү тураһында һорауҙар ҡаралды. Халыҡ фекер алышып кәңәшләшкәндән һуң ауылыбыҙ уртаһынан аҡҡан Тәңребәк шишмәһе өсөн тауыш бирҙе. Урындағы эшҡыуар, рәссам-биҙәүсе Илдар Баймөхәмәтов был изге эшкә ҡағы­лышлы үҙ проектын тәҡдим итте, ул бер тауыштан хупланды.

Үтәктәр тәбиғәт яҙмышына битараф түгел: өс йыл элек ауылыбыҙ башын­дағы шишмә, быйыл Баҡалы ҡойоһо төҙөкләндерелде. Уларҙың тирә-яғы кәртәләп алынды, ағас ултыртылды, ял урындары барлыҡҡа килде, юл­ға ҡырсынташ түшәлде. Шишмәне тәр­типкә килтереүгә урындағы хакимиәт аҡса бүлде, ә Баҡалы ҡойоһон төҙөк­лән­дереүгә киткән сығымдарҙы ауыл­дашыбыҙ Камил Мәхмүтов үҙ өҫтөнә алды. Ул изге башланғысҡа 100 мең һум самаһы аҡса йүнәлтте. Ә биҙәү-тө­ҙөкләндереү эштәрен рәссам Илдар Баймөхәмәтов менән балта оҫтаһы Ринат Маликов урын-еренә еткереп ҡуйҙы. Ике оҫта тыуҙырған ма­турлыҡтан шишмәләребеҙ танымаҫ­лыҡ булып үҙгәрҙе, күркәмләнде.

Әле бына сират Тәңребәк ҡойоһона етте. Ул ауылыбыҙға нигеҙ һалған Үтәк бабай вариҫы Тәңребәк Фәтҡуллиндың исеме менән бәйле. Тәнгә һәм йәнгә сихәт биреүсе шишмәнең һыуын кемдәр генә эсмәгән, кемдәр генә уға рәхмәт уҡымаған. Унан ҡышын да, йәйен дә халыҡ өҙөлмәй. Ауылыбыҙға төшкән йәш килендәргә һыу юлын күрһәткәндә лә тап ошо Тәңребәккә алып киләләр.

Тик тәбиғәт һәр ваҡыт һаҡлауға, яҡлауға мохтаж. Шишмәләр ҙә тәр­биәләп торғанда ғына мул һәм таҙа һыулы була. “Урындағы башланғыс­тарға булышлыҡ итеү” программаһына ярашлы, Тәңребәк ҡойоһо ла хозур, матур урынға әйләнер тип өмөтләнәбеҙ, изге эшкә тотош ауылыбыҙ менән өлөш индерәсәкбеҙ.