Өфөлә “Йыл эшҡыуары-2018” республика конкурсына йомғаҡ яһалды.

Был республика бәйгеһе йыл һайын үткәрелә, уның маҡсаты – Башҡортостандағы эшҡыуарлыҡҡа айырым өлөш индергән бәләкәй һәм урта бизнес вәкилдәрен асыҡлау, уларҙы дәртләндереү. Тәүге тапҡыр сара 2005 йылда үткәрелде. Ә хәҙер ул төбәгебеҙҙең эшлеклеләр даирәһендә йыл һайын әһәмиәтле ваҡиға итеп ҡабул ителә. Быйылғы конкурс нисек уҙҙы? Еңеүселәр кемдәр?

Баш ҡалабыҙҙың Зәки Вәлиди урамындағы “Шератон” ҡунаҡхана­һындағы быйылғы ошо сара күңелле һәм сағыу итеп ойошторолоуы менән айырылып торҙо. “Арғымаҡ” этно-рок төркөмөнөң йөрәктәрҙе елкендерерлек сығышынан һуң еңеүселәрҙе сәхнәгә саҡырып ҡотлау, приздар тапшырыу башланды.

Быйыл “Йыл эшҡыуары-2018” конкурсында ҡатнашырға республи­каның һигеҙ ҡалаһынан һәм 23 районынан теләк белдергәйнеләр. Иң күп ғаризалар – Күмертауҙан, унан 25 эшҡыуар килгән. Өфөнән – 14 йүнсел, Стәрлетамаҡтан – алтау, Бәләбәй, Бөрйән, Мәсетле һәм Хәйбулла райондарынан өсәр кеше тәҡдим ителгән.

Конкурста бөтәһе һигеҙ номинация ҡаралғайны. Бүләкләү үҙенсәлекле ойошторолдо: һәр номинацияла өсәр эшҡыуарҙы сәхнәгә саҡырып сыға­ралар ҙа алып барыусы ҡулына конверт тотторола, уны асып уҡығанда ғына бөтә зал еңеүсенең исемен ишетә. Мәҫәлән, “Эске туризмды үҫтереү даирәһендәге иң яҡшы эшҡыуар” номинацияһында түргә Бөрйән районынан “Бөрйән” туристик базаһы етәксеһе Динар Зарипов, Стәрлетамаҡ ҡалаһынан Юлиә Ғималова һәм Күмертау ҡалаһынан Алексей Ефимов саҡырылды. Республиканың Эшҡы­уарҙар ойошмалары ассоциацияһы рәйесе Алексей Щербацкий конвертты асты: еңеүсе – Юлиә Рәйес ҡыҙы! Ҡалған икәүгә лауреат дипломдары тапшырылды.

Шулай уҡ етештереү, ауыл хужа­лығы, күмәртәләп һәм ваҡлап һатыу сауҙаһы, эшҡыуарлыҡҡа консалтинг хеҙмәтләндереүе, йоғонтололоҡ һәм үҫеш, аҙыҡ-түлек тармағы, әүҙем тормош позицияһы буйынса ла еңеүселәр һәм лауреаттар билдәләнде.