Әйҙәгеҙ әле, гәзиттә электән үк алтаҡталарҙағы хаталы яҙыуҙарға ҡаршы алып барылған эште дауам итәйек. Был мәсьәләне ҡуҙғатыуымдың төп сәбәбе – әле булһа урамдарҙа, юл саттарында хаталы яҙыуҙар кәмемәй. Улар хаҡында республикабыҙ матбуғаты аша даими сығыш яһаһаҡ, бәлки, хәл аҙ булһа ла үҙгәрер.

Ейәнсура районының Үтәғол ауылынан һуң Ырымбур өлкәһенә боролған юл сатында “Оренбург”, “Ырымбург” тигән билдәләр күренә. Кем шулай хаталы яҙғандыр инде, бик күптән тора ошо юл күрһәт­кестәре.


Өфөнөң Орджоникидзе районын­дағы Тимашев ауылында “Остановка “Школа” тигәнде “Мактап” туҡта­лышы” тип тәржемә иткәндәр.
Бындай хаталар аҙым һайын тигәндәй осрай. Мәҫәлән, “ХозМир” сауҙа селтәре етәкселеге “Все для дома и дачи” тигән һүҙбәйләнеште “Барыһы өсөн йорт һәм дача” тип тәржемә иткән, һөҙөмтәлә ул бөтөнләй икенсе мәғәнә алған. “Аҙыҡ-түлек” тигәнде “у” хәрефе менән яҙыу осраҡтары ла – иң йыш осраған хаталарҙың береһе.

Бына ошоларҙан сығып, тәҡди­мемде еткергем килә: хаталы яҙыу­ҙарға ҡаршы бергәләп яу асайыҡ. Бөгөн һәр кемдең ҡулында сифатлы фото төшөрөү мөмкинлеген биргән телефон бар. Кем ҡайҙа ниндәй хаталы алтаҡта күрә, фотоға төшөрөп, гәзит редакцияларына ебәрһен, социаль селтәрҙәргә һалһын. Республикала махсус терминология комиссияһы булдырыл­ған, уның бәйләнеш координаттарын да киң йәмәғәтселеккә таратыу зарур, тип уйлайым.