Уҡытыусым!
Түҙемлегең ҡая һымаҡ,
Ә күңелең тулы нур ғына.
Ябайһың да, бөйөкһөң дә
үҙең,
Һиңә тиң тик маҡтау,
йыр ғына,
– тигән шиғыр юлдары фәҡәт минең башҡорт теле һәм әҙәбиәтенән уҡытыусым Рәмилә Шакирйән ҡыҙы Әхмәтшинаға (Йәғәфәрова) арнап яҙылған кеүек. Баймаҡ районы Әбделкәрим ауылында уҡыусыларға белем биреү өсөн көсөн, ваҡытын йәлләмәй, иңенә төшкән бурысын күңел һалып, намыҫ менән башҡарған остазым – минең өсөн әле лә телһөйәрлек һәм талапсанлыҡ өлгөһө. 

Дәрес һайын ниндәйҙер яңылыҡ индерә, өҫтәмә материалдар әҙерләй, ҡыҙыҡлы һәм мауыҡтырғыс итеп алып бара Рәмилә Шакирйән ҡыҙы. Беҙ йотлоғоп тыңлай­быҙ, фекер алышабыҙ, шул уҡ ваҡыт­та уға оҡшарға тырыша инек. Класта ултырған һәр баланың икенсе дәрескә һис шикһеҙ әҙерләнеп килеүе, күләмле инша һәм башҡа яҙма эштәрҙе бер ниндәй ҡыйын­лыҡһыҙ яҙыуы, уҡыусыларҙың үҙ фекерен ҡыйыу яҡлауы артында ниндәй оло хеҙмәт ятыуын мин хәҙер, үҙем уҡы­тыусы булғас ҡына, аңланым.

Был һөнәрҙе һайлауыма үкенмәйем. Эшен яратҡан, уҡыусыларына ҡарата талапсан, тырыш, маҡсатлы Рәмилә Шакирйән ҡыҙы кеүек булырға, ул биргән белем һәм күңел байлығын йәш быуынға түк­мәй-сәсмәй өләшергә тырышам. Остазымдың ире Марат Азат улы Йәғәфәров та һәр баланың йөрәгенә юл, асҡыс таба белгән оло йөрәкле уҡы­тыусы ине. Ул беҙгә йомшаҡ, хәстәрлекле, һәр беребеҙгә иғтибарлы булды. Тел серҙә­рен өйрәтеп кенә ҡалмай, тормош һабаҡтарына ла төшөн­дөр­ҙө. Хеҙмәт­тәш­тәре, ата-әсә алдында абруй яулаған мөғәллимдәр уҡы­тыусы булып эшләмәне, ә уҡытыусы булып йәшәне. 

Йөҙөнән яҡтылыҡ бөркөлөп торған Рәмилә апайға килә­сәктә лә тирә-яҡҡа нур сәсеп, һаулыҡта йәшәргә яҙһын! Рәхмәт Һеҙгә!