Энгель Зәйнетдинов – нефть һәм уның әһәмиәте, бигерәк тә үҙебеҙҙең Башҡортостанға ҡағылышлы тарихы буйынса әүҙем, уңышлы эшләгән автор. Был темаға арналған бер нисә китабы сыҡты, гәзит-журналдарҙа ҡыҙыҡлы, фәһемле яҙмалары даими баҫыла.

Нефть геологияһында асыштарҙы, нефть скважиналарын быраулау ысулдарын, ҡорамал-инструмент­тарҙың заман талаптарына ярашлы үҙгәреүен, бөгөнгө торошон еткерә уҡыусыларға. Әммә, минеңсә, уның хеҙмәтенең иң мөһиме – кешеләр, шәхестәрҙе иҫкә алыу, юғалған, онотолғандарҙың исемен халыҡҡа кире ҡайтарыу, уларға тейешле иғтибарҙы арттырыу.

Миҫалға, Ишембайға арналған күләмле мәҡәләһендә эҙләнеүҙәр, ятҡылыҡты табыу тарихы, шунда ҡатнашыусылар тураһында ентекле бәйән итте (“Ватандаш” журналы, 2017 йыл, 1-се һан). Үкенесле, 30-сы йылдарҙа Ишембай нефтен асҡан һәм үҙләштергәндәрҙән 86 кеше золом ҡорбаны була. Уларҙың күбеһе – урындағы етәкселәр, зыялылар, инженер-техник белгестәр. Нефть сәнәғәтен үҫтереүгә ҙур өлөш индер­гән хеҙмәт кешеләренең исеме оно­толорға тейеш түгел, ти автор һәм улар­ҙың һәр береһе хаҡында иҫкә алып, яҙмаларында тейешле баһа бирә.

Э.Ә. Зәйнетдиновтың (Д.И. Михайлов менән авторҙашлыҡта) “Башкирская нефть и ее первопроходцы (XVIII – XX в.в.)” тигән күләмле китабы ғү­мерен нефть сәнәғәтенә арнап, хаҡ­лы ялға сыҡҡандар, бөгөнгө хеҙ­мәт­тәштәр, яңы ғына эш башлағандар өсөн берҙәй ҡыҙыҡлы, ылыҡтырғыс. Беренселәренә – хәтер, икенселәренә – уйланыу, өсөнсөләренә – буласаҡ һөнәр серҙәре.

Авторҙың тармаҡ торошо киң һәм тәрән өйрәнелгән “Нефть Победы” исемле китабы ла йәмәғәтселек тарафынан йылы ҡабул ителде, күптәр өсөн тормош дәреслегенә әүерелде.

Быраулаусы-инженер, иҡтисад фәндәре кандидаты Энгель Зәй­нетдинов 40 йыл самаһы “Башнефть” берекмәһендә эшләне. Әле лә уның йәмәғәт тормошо уртаһында ҡайнай. Ойошманың генераль директоры, Социалистик Хеҙмәт Геройы, легендар шәхес Евгений Столяров (1922 – 1985 йй.) хөрмәтенә иҫтәлектәр йыйын­тығының автор-төҙөүсеһе лә ул. Бөйөк Ватан һуғышы ветераны, скважи­наларҙы быраулау хеҙмәт юлында бөтә баҫҡыстарҙы үткән Социалистик Хеҙмәт Геройы Д.И. Ми­хайловҡа арналған китабы ла – оло әһәмиәткә эйә хеҙмәт.

Илебеҙҙең, республикабыҙҙың иҡтисади нигеҙе булған нефть һәм газ тармағына ҙур иғтибар бүлгән Э.Ә. Зәйнетдиновтың Шәһит Хоҙай­бирҙин исемендәге премияға тәҡдим ителеүен ихлас хуплайым. Талантлы шәхес юғары баһаға, һис шикһеҙ, лайыҡ.