Пенсия фонды бүлексәһенә паспорт, СНИЛС, никах таныҡлығын ғына алып барҙым. Әммә унда тағы ла әллә күпме документ кәрәклеге тураһында белдерҙеләр, хатта түбәндәге исемлекте тотторҙолар.

Баҡтиһәң, паспорт, пенсия страховкаһы таныҡлығы, хеҙмәт кенәгәһе, диплом, никах һәм бала тыуыу тураһында таныҡлыҡ, банк реквизиттары менән бергә ошо документтарҙың күсермәләре лә кәрәк икән, шуға күрә Фондҡа юлланыр алдынан уларҙы әҙерләргә онотмағыҙ. Мин Пенсия фондына хаҡлы ялға сығыу йәшенә еткәнгә тиклем ике ай алдан барҙым. Унда иһә бер ай ҡалғас килергә ҡуштылар. Компьютерҙан минең туралағы мәғлүмәтте тикшереп сығып, пенсия күләме хаҡында белдерҙеләр һәм, бер аҙ эшләп алған заводҡа барып, хеҙмәт хаҡы күберәк булған биш йыл өсөн белешмә ҡағыҙы килтерергә кәңәш иттеләр.

Элек эшләгән еремә киттем. Унда миңә заводтың исемен алмаштырыу тураһында документ та бирҙеләр. Ә миңә кәрәкле белешмә иһә өс аҙнанан ғына әҙер булды. Әйткәндәй, Һаҡлыҡ банкына барып, пенсияны күсерер өсөн социаль карта алырға онотмағыҙ. Шуныһы ҡыҙыҡ: унда кредит картаһын шунда уҡ тапшырҙылар, ә социаль картаны бер нисә көн көттөрҙөләр. Интернетта кредит карталарына бәйле ваҡиғалар тураһында уҡып, “сәстәрем үрә торҙо”, банкка кире барып, уны үҙҙәренә ҡайтарыу яғын ҡараным. Картаны күҙ алдымда киҫкеләп ташланылар, әммә уның ике ай дауамында минең исемдә ҡаласағы хаҡында белдерҙеләр. Шуға күрә кредит картаһы кәрәкмәй икән, унан шунда уҡ баш тартығыҙ.

Ниһайәт, Пенсия фонды бүлексәһенә бөтә документтарҙы ла йыйып килтерҙем. Бүлексә хеҙмәткәре уларҙы ҡарап сыҡҡандан һуң пенсия күләмен иҫәпләп сығарҙы. Әллә ни ҙур аҡсаға өмөт тә итмәй инем, сөнки башта техникумда, унан институтта уҡыным, бер аҙ эшләп алғас, бер-бер артлы ике декрет ялында булдым, сабыйҙарым менән ултырҙым... Кескәй балалар менән эшкә урынлашыуы ла еңелдән түгел шул. Шәхси эшҡыуар булып теркәлгәнемә иһә һигеҙ йыл булды.


Документтарымды ҡабул итеп алдылар, пенсия таныҡлығын алырға килеү ваҡытын әйттеләр. Тәғәйен сәғәткә килдем, әммә ул әҙер булмай сыҡты. Ә миңә 55 йәш бер аҙна элек үк тулғайны. Таныҡлыҡты тағы ла бер аҙна көтөргә тура килде.

Хәҙер инде социаль карта алыу өсөн Халыҡты социаль яҡлау хеҙмәтенә юл алдым. Унда минән ғаризаны ҡабул иттеләр һәм бер айға юл йөрөү өсөн ваҡытлыса карта бирҙеләр. Уның ярҙамында ҡала транспортында бушлай йөрөргә мөмкин икән. Шул уҡ ваҡытта паспорт менән пенсия таныҡлығын һәр саҡ үҙең дә тотоу фарыз.

Әйткәндәй, Пенсия фонды сайтында, барлыҡ мәсьәләләр буйынса, шулай уҡ документтарҙы алдан тикшереү, эш биреүсе тултырған документтарҙағы һәм шәхси мәғлүмәттәрҙәге хаталарҙы асыҡлау һәм төҙәтеү өсөн граждандарға һәм эш биреүселәргә страховкаланған кешенең йәшәгән урыны буйынса Пенсия фонды органдарына хаҡлы ялға сығыу йәшенә еткәнгә тиклем кәмендә 12 ай алдан мөрәжәғәт итергә, тип яҙылған.

Ниндәй документ кәрәк?

Пенсияны рәсмиләштереү өсөн тәүге тапҡыр Пенсия фондына барғанда түбәндәге документтар талап ителә:

*паспорт;
*СНИЛС (дәүләт пенсия страховкаһы таныҡлығы);
*хеҙмәт кенәгәһенең төп нөсхәһе;
*мәшғүллек хеҙмәтенең белешмә ҡағыҙҙары (булған осраҡта);
*архивтан белешмә ҡағыҙҙары (булған осраҡта);
*хәрби билет (хәрби хеҙмәттә булған осраҡта);
*эшҡыуарлыҡ эшмәкәрлеге менән шөғөлләнеүҙе раҫлаған документтар (кәрәк тип табылһа);
*2000 йылдың 1 ғинуарына 60 айға эш хаҡы тураһындағы документтар (кәрәк тип табылһа);
*юридик яҡтан әһәмиәтле башҡа документтар (никах, бала тыуыу таныҡлығы һ.б.)