Шәхестәр үҙебеҙҙә үҫергә тейеш.

Илебеҙҙең киләсәге һәләтле балалар ҡулында икәнлеген һәр кем яҡшы аңлай, шуға күрә педагогтың бурысы – уларҙы ваҡытында күреү, маҡсатлы эш алып барыу, уҡыусыларҙың һәләтен үҫтереү.

Был йәһәттән Хәйбулла районы хакимиәте мәғариф бүлеге менән берлектә тығыҙ эш алып бара.

Төбәктә бер нисә йыл рәттән һәләтле балаларҙы дәртләндереү маҡсатында район хакимиәте баш­лығының премияһы булды­рылған, күп йүнәлештәге профилле лагерҙар эшләй. Рәсәй олимпиадаһында еңеүселәрҙе Ҡара диңгеҙ буйына ял итергә ебәреү, төрлө ерҙәргә экскурсия­ларға йөрөтөү ҡаралған. Ғәмәлдә бындай йүнәлештәге эштәр Аҡъяр­ҙың 2-се мәктәбендә маҡ­сатҡа ярашлы алып барыла. Был хаҡта мәктәп директоры Нияз Хәмзә улы Рыҫҡолов бына ни һөйләй:

– Һәләтле баланы күрә белеү тәү сиратта уҡытыусынан тора. Уның талантын бар яҡлап асыуҙа ата-әсәнең һәм мәктәп етәкселе­генең дә әһәмиәте ҙур. Берен­сенән, баланы ҡыҙыҡһындырыу кәрәк, икенсенән, уны дәртлән­дереү мотлаҡ. Ошо тәңгәлдә эш алып барғанда ғына һәйбәт һөҙөмтәләргә өлгәшергә мөмкин.

Беҙҙең мәктәптә һәр баланы шәхес итеп үҫтереү, уның бар яҡлап һәләтен асыу, талантын ки­ңәйтеү маҡсатында эҙмә-эҙлекле эш алып барыла. Бында иң тәүҙә түңәрәктәрҙең әһәмиәте баһалап бөткөһөҙ. Төрлө түңәрәк­тәрҙә һәм спорт секцияларында шөғөлләнеү баланың үҫешенә ыңғай йоғонто яһап ҡына ҡалмай, уны оло тормошҡа әҙерләй. Иң мөһиме – үҙенә оҡшаған ҡыҙыҡ­һы­ныуын ҡәнәғәт­ләндерә, килә­сәккә һөнәр һайлауҙа дөрөҫ йүнә­леш бирә, һәләтен бар тулы­лығында асыуға булышлыҡ итә.

Мордва Республикаһының Саранск лицейында белем алған Тимур Дәүләтбаев – мәктәбебеҙ уҡыусыһы. Уның бөгөнгө Бөтә донъя олимпиадаһындағы ҡаҙа­ныш­тарына тәүге баҫҡыстар тап беҙҙең белем усағында һалынған. Әгәр ҙә республикала Тимур кеүек һәләтлеләрҙе артабан үҫтереү йүнәлешендәге мәктәп­тәр булғанда, күпме бала үҙебеҙ­ҙең Башҡортостан данын яҡлар ине!

Үҙебеҙҙең төбәккә килгәндә, беҙҙең ра­йон­да был яҡтан эш яҡ­шы ойошторолған. “Робот тех­никаһы”, “Авиамодель”, “Судомодель” йүнәлешендә буласаҡ инженер­ҙарҙы тәрбиәләгән түңә­рәктәр эшләй. Каникул осоронда балаларҙың һәләтен үҫтереү һәм нығытыу маҡсатында ошо йүнә­лештәге профилле лагерҙар ойошторола. Йәйге миҙгелдә балалар ял итеп кенә ултырмай, техник белемдәрен һәм оҫталыҡ­тарын арттыра, үҙ-ара тәжрибә уртаҡлаша.

Беҙҙең мәктәп уҡыусыһы Яҙ­гөл Тө­рөп­ҡолова әле Ҡара диңгеҙ буйында ял итә. Ул – район, республика, Рәсәй олим­пиа­даһы еңеүсеһе. Һәләтте үҫтереүҙең төп шарты уҡыусыны ҡыҙыҡһын­дырыу һәм дәртләндереү икәнлеген бер кем онот­маҫ­ҡа тейеш, шул иҫәптән ата-әсә лә, уҡытыусы ла.