Республикала төрлө милләт вәкилдәре үҙ йолаларын һаҡлай

Үткән йыл аҙағында Васильевка ауылы клубы ремонттан һуң йәнә үҙ ишектәрен асты. Ремонт эштәре муниципаль һәм Петровский ауыл биләмәһе хакимиәте бюджеты ярҙамында 2,5 миллион һумға башҡарылған. Эстән дә, тыштан да балҡып торған мәҙәниәт усағынан хәҙер дәртле халыҡ өҙөлмәй тиерлек. Ауыл байрамы ла яланда түгел, ә ошо бина янында үтте.

– Концерттарға, сыуаш халҡы­ның йолаларын тергеҙгән һәм һаҡлаған түңәрәктәргә оло быуын ғына түгел, йәштәр ҙә гөрләп килә, – тип шатлыҡтары менән уртаҡлашты клуб мөдире Вера Филиппова. Әйтелгәндәрҙе дә­лилләгәндәй, милли күлдәктәр­ҙәге инәйҙәр, бала арбалары этеп килгән, кескәй ул һәм ҡыҙҙарын етәкләгән йәш ата-әсәләр клуб яғына ағылды. Бесән-ураҡ мәле булыуға ҡарамаҫтан, халыҡ күп йыйылғайны. Һай, дәртле лә икән сыуаш халҡы! Милләттәштәренең шатлығын уртаҡлашырға тип, Башҡортостандың сыуаш мәҙәниәте йәмғиәте рәйесе Юрий Михайлов үҙе лә килгән.

– Васильевка ауылында дәрт­ле, тырыш халыҡ йәшәй, тормо­шо­ғоҙ – бәрәкәтле, бөгөнгө байра­мығыҙ мөбәрәк булһын, – тип теләктәрен еткерҙе Өфө вәкиле.

Ысынлап та, был ерҙәге йәшәйешкә һоҡланып туйғыһыҙ. Бөтмөр халыҡ иртә яҙҙан үрсетмә үҫтереп, тирә-яҡ ауылдарға, баҙарға йөрөп һата, күпләп мал-тыуар аҫрай, үҙ техникаһында хеҙмәт күрһәтеүселәр байтаҡ, шулай уҡ халыҡ урындағы ҙур ауыл хужалығы предприятие­һында эшләй. Шуныһы ҡыуаныс­лы: быйыл ғына атай-әсәй булған йәш ғаиләләр ҙә бар, улар ҙа башҡаларҙан ҡалышмай, гөрлә­теп донъя көтә. Икенсегә-өсөн­сөгә ҡулдарына сабыйҙарын алғандар ҙа бихисап. Мәҫәлән, Семеновтар ғаиләһендә лә яңы­раҡ бала тыуған. Ошо шатлыҡ­тары менән уртаҡлашып, сарала уларҙы ла тәбрикләнеләр. 50-60 йыл бергә ғүмер кисергән пар­ҙарҙы ҡотлау иһә васильевка­ларҙың һәр быуынға, һәр кемгә иғтибарлы булыуына ишара.

Байрам булғас, йыр-моң да яңғырай, дәртле бейеүҙәр күңел­дәрҙе елкендерә. Был йәһәттән шуныһы иғтибарға лайыҡ: һәр күренештә тиерлек милли һыҙаттар сағылып торҙо.

– Йолаларыбыҙҙы ихтирам итеп йәшәйбеҙ, ата-бабаларыбыҙ элек-электән традицияларҙы һаҡлауҙы васыят итеп ҡалдырған, – тине Петровский ауыл билә­мәһе хакимиәтенең эштәр ида­расыһы, ошо ауыл ир-уҙа­маны Николай Жуков. Ғөмүмән, васильевкалар ата-баба васыятына тоғро ҡалып йәшәй, матур итеп донъя көтә, милли йолалар нигеҙендә байрамдар үткәрә.