Балтас районында “Рәсәй һыуы” экологик акцияһы булды. Район кимәлендә үткәрелгән сарала 800 кеше ҡатнашты, 20 һыу ятҡылығы таҙартылды. Етеҙ Танып йылғаһы ярының 30 километры, бынан тыш күлдәр, быуалар һәм бәләкәй йылғалар буйын халыҡ йәйге миҙгелдә йыйылған сүп-сарҙан таҙартты, йылға буйҙарын тәрәнәйтте.

Түбәнге Һикеяҙҙа ла акцияға әүҙем ҡушыл­дылар. Был ауыл халҡын үҙ артынан әйҙәп, сараға алдан әҙерлек алып барған Роза менән Зәки Мифта­ховтарға рәхмәтлебеҙ. Ғүмер буйы уҡытыусы булып эшләгән был ғаилә Юҡ йылғаһы буйында йәшәй. Кәртә­ләренең аръяғында ғына шишмә лә бар. Йыл һайын улар әлеге бәләкәй йылғаны таҙартып, ярҙарын тәрәнәй­теп, төҙөкләндереп, тыуған яғының гүзәллеген һаҡлап ҡалыуға ҙур көс һала.
– Һаҙланған урынын таҙартып, үләнен алып, бер аҙ тәрәнәйтеп тормаһаң, йылға һайыға. Тирә-яғына ағас ултыртмаһаң да, ҡорой башлай. Шуға йыл да үҙебеҙҙең йортҡа яҡын урындарҙы булһа ла рәтләп торабыҙ. Быйыл йылғаны таҙартыуға ауыл халҡы ла әүҙем ҡушылды. Йыл да бындай сараны байрам кеүек үткәрергә кәрәк, – ти Мифтаховтар.
Башҡортостандың Тәби­ғәттән файҙаланыу һәм экология министр­лығының Бөрө территориаль комите­тының әйҙәүсе белгес-эксперты Рифат Сафин әйте­үенсә, Балтастан эстафета Тәтешле һәм Борай район­дарына тапшырылған. Баш­ҡортос­тан биләмәһендә Етеҙ Танып таҙартылғас, эстафета Пермь крайына тапшырыласаҡ.
Министрлыҡ үткәргән “Рә­сәй һыуы” акцияһы һөҙөмтәһе буйынса республика Рәсәй кимәлендә дүртенсе урын­ға сыҡҡайны. Былтыр акцияға ярашлы 1600 сара үткәрелде, унда ике меңгә яҡын кеше ҡатнашты.