Республика район үҙәктәре, ҡалалар бөгөн ҙур төҙөлөш майҙансығын хәтерләтә, һәр ерҙә яңы йорттар ҡалҡа, социаль объекттар сафҡа инә. Мәктәптәр, балалар баҡсалары тапшырылып, уларҙа шат балалар тауышы тынмай.

Шуныһы ҡыуаныслы: күп ҡатлы йорттар менән бер рәттән шәхси йортон һалып сығыусылар ҙа байтаҡ. Шөкөр, республикала әле төрлө маҡ­сатлы программалар уңышлы тормошҡа ашырыла, торлаҡҡа мохтаждарға дәүләт тарафынан һәр яҡлап ярҙам күрһә­телә. Етемдәрҙең, иҫке йорт­тарҙа көн иткәндәрҙең проблемалары ыңғай хәл ителә, район хакимиәттәре был юҫыҡта интеккән кеше­ләрҙе уңайлы, заманса һәм, иң мөһиме, арзан фатирҙар менән тәьмин итә.
Шишмә районында ла был йәһәттән эштәр яҡшы ҡуйыл­ған, төрлө программалар сик­тә­рендә торлаҡҡа мохтаж граждандарға бөтә уңайлыҡ­тары булған фатирҙар бүленә. Мәҫәлән, былтыр төбәктә 33495,3 квадрат метр торлаҡ сафҡа ингән. Һуңғы өс йылда Шишмә ҡасабаһында алты дүрт ҡатлы күп фатирлы йорт файҙаланыуға тапшырылған. Уларҙағы торлаҡ етемдәргә, авария хәлендәге йорттарҙа йәшәгәндәргә, тол ҡатындарға һәм Бөйөк Ватан һуғышы ветерандарына бирелгән. Йорт туйлаусылар фатирҙарҙың сифатлы, экологик яҡтан таҙа материалдарҙан һалыныуын, өй яны билә­мәләренең төҙөк­ләндерелеүен билдәләй. Иркен, яҡты фатир­ҙарҙың зауыҡ менән биҙәлеп, кәрәкле сантехника, газ ҡора­мал­дары менән дә йыһаз­ландырылыуы төҙөүселәрҙең абруйын күтәрә. Әйткәндәй, төҙөлөштө Баш­ҡортостан Республикаһының Торлаҡ төҙөлөшө үҫеше фонды менән “СтройТехКом” яуап­лылығы сикләнгән йәмғиәте алып бара.
— Бөгөн төбәкте танымаҫ­һың да, төҙөлөш бер генә минутҡа ла туҡтағаны юҡ, матур-матур күп ҡатлы йорттар кү­тәрелә, шәхси йорттар һалы­на, — ти район хакимиәтенең төҙөлөш, иҡтисад буйынса урынбаҫары Камил Ураҙмәтов. — Хәҙер төҙөлөш материалдары баҙарында нимә генә юҡ, аҡсаң булһа, бер ай эсендә бына тигән йорт ҡалҡытырға мөмкин.
Киләсәктә лә граждандарҙы торлаҡ менән тәьмин итеү маҡсатында район хакимиәте тарафынан “2025 йылға тиклем торлаҡ шарттарын яҡшыр­тыуға мохтаж граждандарҙы тораҡ биналар менән тәьмин итеү” программаһы ҡабул ителгән. Шишмә районы “Рәсәй ғаиләләре өсөн торлаҡ” республика программаһында ла ҡатнаша. Уның сиктәрендә Шишмә ҡасабаһының яңы Яр буйы биҫтәһендә план­лаш­тырылған һигеҙ ике ҡатлы йорттоң икәүһе төҙөлә лә инде. Тәүге йорт август айында тапшырыласаҡ, бәхетлеләр көҙ өй туйлаясаҡ. Ә икенсеһе йыл аҙағында сафҡа инәсәк. 2025 йылға тиклем был биҫтәлә бөтәһе 36722,48 квадрат метр торлаҡ, йәғни 792 фатир, үҙ хужаһын табасаҡ.
Билдәләп үтеүебеҙсә, Шиш­мәлә төҙөлөш туҡтағаны юҡ. Һуңғы өс йылда, мәҫәлән, район үҙәгендә көнөнә 400 кеше ҡабул итерлек ололар, 200 кешене ҡабул итерлек балалар поликлиникалары асылған. Йөҙөү бассейны булған ябыҡ типтағы спорт-һауыҡтырыу комплексы, 100 урынлыҡ балалар баҡсаһы, “Алкин” шифа­ханаһында 160 урынлыҡ балалар баҡсаһы сафҡа ингән. Тағы ла “Юбилейный” биҫтә­һендә яңы ҡаҙанлыҡ, Сәфәр ауыл мәҙәниәт йорто база­һында фельдшер-акушерлыҡ пункты үҙ ишектәрен асҡан.
— Халыҡ иркен, бөтә уңай­лыҡтары булған фатирҙарҙа йәшәргә тейеш, ә беҙ хәле­беҙҙән килгәнсә ярҙам итергә тырышасаҡбыҙ. Яңы йорттар киләсәктә лә төҙөлөр, халыҡ шатлыҡ-ҡыуаныста имен донъя көтһөн, — ти Камил Шамил улы.