Элегерәк, байҙар әле “десятка”ла елдергәндә, “Мин, моғайын, кешеләр машина урынына самолетта оса башлағас ҡына автомобиль алырмын инде” тип йыш ҡына зарлана торғайны бер ағай. Хәҙер был һүҙҙәрен иҫенә лә төшөрмәй ул – үҙе ике “унынсы”ны туҙҙырҙы. Ә кешеләр, ул әйткәнсә, һаман да “ҡанатлы” автомобилдә елдермәй әле.


Шулай ҙа, мәғлүмәттәргә таянған­да, яҡын киләсәктә оса торған авто­мобилдәр күпләп етештерелә башлауы ихтимал. Өлгө өсөн, тәжрибә нигеҙендә һауаға күтәрелгән техника тураһында әленән-әле ишетелеп тора.
Матур дизайн, аҡыллы идара итеү системаһы, хәүефһеҙлек буйынса конкурентлыҡ иткән машина етеште­реүселәр нисек тә клиенттарын юғалт­маҫҡа тырыша һәм яңынан-яңы алымдар уйлап табып тора – “ҡанатлы” машина ана шул мөхиттең бер билдәһе, күрәһең. Кемдер оса торған такси етештерергә йыйына, бәғзеләр “Ашығыс ярҙам” моделен әҙерләй.
Әлбиттә, яңы төр машиналар ғәҙә­ти автомобиль формаһында буласаҡ тигәнде аңлатмай был. Бәлки, ул верто­летҡа ла оҡшар, осоусы дрондар ҙа күп хәҙер. Әммә, белгестәр фекеренсә, барыбер ғәҙәти авто­мобилгә тартым буласаҡ.
Таксиға килгәндә, уны Porsche компанияһы етештерергә иҫәп тота. Был алымын компания вәкилдәре кешеләрҙе тығындарҙа ултырыуҙан ҡотҡарыу ниәте менән атҡарырға уйлай. Уларҙың иҫәбе буйынса, авто­мобилдә ерҙән ярты сәғәт үтерлек юлды хәҙер өс минутта осорға мөмкин буласаҡ. Осоу аппараты тигәс, был ма­шинаға идара итеү өсөн махсус лицензия талап ителеүе көн кеүек асыҡ. Әммә “Порше” вәкилдәре әйтеүенсә, рөхсәт кәрәкмәйәсәк, сөнки идара системаһы автоматлаш­тырылған.
Шул уҡ ваҡытта 2030 йылда Германияла халыҡты оса торған “Ашы­ғыс ярҙам” машиналары хеҙмәт­ләндерә башлауы мөмкин. Был мәсьәләне дәүләт кимәлендә хәл итергә йыйыналар. Бындай төр автомобиль һауа­ла төтөн сығарып китеп бармаҫ инде. Шуға ғалимдар уның осоу мөмкинлеге генә түгел, двигателе өҫтөндә лә ныҡлы эшләй. Яҡынса күҙаллауҙар шуны билдәләй: мотор ябай яғыулыҡ менән хәрәкәт итмәйәсәк.
Әйткәндәй, киләсәктә шулай уҡ осоусы мотоциклдар ҙа етештерелә башлауы ихтимал. Быныһы инде бигерәк ҡулай буласаҡ, сөнки күп сығым талап ителмәй, ул еңел һәм ҙур түгел. Ошо урында үҫмер саҡта ауылда “тимер ат”тарҙы этеп тоҡан­дырған мәлдәр иҫкә төшә. Хәйер, яңы төр техника ерҙән этеп йүгергәндәренән әллә нисәмә тапҡыр сифатлыраҡ булыр шул.
Бер рәхәттең — бер ҡыйыны, тигән­дәй, был машиналар менән һауала нисек идара итергә һуң? Ярай, осоуға ҡамасаулаған ҡарғаны компьютерҙа күреп булыр, ә бына ҡаршыға осҡан машинаның водителе иҫерек булһа... Шул уҡ ерҙәге юл-транспорт ваҡиғаһы килеп сыҡмаҫ­мы? Әле юлдарҙа йылына меңәрлә­гән кеше автомобиль ҡорбаны була...
Ни генә тимә, тығындарҙа ултырған “Ашығыс ярҙам” бригадаһы тиҙ генә килеп етеп, кешенең ғүмерен ҡот­ҡарып ҡалһа, бер ҙа насар түгелдер. Һәр хәлдә, оса башлағас белербеҙ. Уныһы инде ҡасан булыр – авто­сәнәғәт магнаттарынан тора. Ҡасан­дыр электромобиль дә фантастика булып тойола ине. Ана хәҙер шундай автомобилдә Жириновский әфәнде үҙе елдерә. Кешенең баш мейеһен икенсе кешегә күсереп ултыртҡан, бесәйгә электрон ҡойроҡ яһаған заманда осоусы автомобилдәрҙе лә оҙаҡ көтмәҫбеҙ.