Милли байрамдың күңелле ауаздары, әллә ҡайҙарға таралып, һәммәһен “Ватан” этно-паркындағы “Башҡорт тирмәһе”нә саҡырҙы. Иркен майҙанда ҡатын-ҡыҙ һәм бала-саға күңел асһа, тирмә эсендә сәй табыны әҙерләнгәйне.

– Иғтибарҙы күберәк балалар­ға йүнәлтергә тырыштыҡ. Ҡалала үҫеп килгән йәш быуынға матур йолаларҙы, йыр-бейеүҙе, уйын­дарҙы өйрәтке килә, – ти сараның ойоштороусыһы, “Башҡорт тирмә­һе”нең хужабикәһе, шәхси эшҡыуар Сәрүәр Аслаева.
Изге ниәтте “Селтәр” милли кейем студияһы һәм Дим райо­ны­ның “Тулған ай” фольклор ансамбле ағзалары шунда уҡ кү­тәреп алған. Милли кейемдәр, күстәнәстәр тултырылған ауыр-ауыр юл сумкаларын йөкмәп, баш ҡаланың төрлө тарафынан килеп еткәйне улар. Уйындарҙы ойоштороуҙы, йолаларҙы үтәүҙе лә үҙ өҫтәренә алдылар. Кескәй­ҙәрҙең генә түгел, осраҡлы килеп юлыҡҡан башҡа милләт вәкил­дәренең дә был йор һүҙле, шаян ағинәйҙәр эргәһенән киткеһе килмәне.
Балалар үҙ һөнәрен күрһәтә башлағас, ниндәй матур, аҡыллы алмаш үҫә, тип һөйөндө ололар. Рәми Ғариповтың, Рәшит Шәкүр­ҙең туған тел тураһындағы ши­ғыр­ҙарын һөйләгән, халыҡ йыр­ҙарын йырлаған, башҡорт көйҙә­ренә бейегән ҡыҙҙар, шаян таҡ­маҡ­тар әйткән, сүрәләрҙе яттан белгән малайҙар – барыһы­ның да сығышы күңелдәргә май булып яғылды. Сәрүәр Аслаева уларға иҫтәлекле бүләктәр әҙерләп ҡуйғайны.
Байрам аҙағында ағинәйҙәр йылдың уңышлы, имен килеүен теләне, һәммәһен майлы тары бутҡаһы менән һыйланы.
Халҡыбыҙ һәр заманда ла бер­ҙәм булһын, быуындар ара­һын­дағы бәйләнеште өҙмәһен өсөн, боронғолар ошондай матур байрамдар уйлап сығарған. “Баш­ҡорт тирмәһе”ндә уларҙы киләсәктә лә даими уҙғарырға ниәтләнәләр.
– Башҡорт ҡатын-ҡыҙы бөгөн милли сараларҙа ҙур әүҙемлек күрһәтә, ә ир-уҙамандар ара­һында тарҡаулыҡ тойола. Ошо хәлде төҙәтергә теләп, быйыл аҡһаҡалдар йыйынын ойош­торорға уйлайбыҙ. “Кәкүк сәйе” оло сара алдынан әҙерлек булды, – ти Сәрүәр Ғилметдин ҡыҙы.