Силәбе өлкәһендә йәшәгән яҡташыбыҙ Фәһим Мостаев – ауырлыҡтарға бирешмәҫ, яҙмыш һынауҙарына һынмаҫ, һығылмаҫ уҙаман. Ул беҙҙе яҡты йөҙ менән ихлас ҡаршыланы.


Былтыр туҡһан йә­шен тул­тырған Фәһим Камил улы Бүздәк районының Түреш ауылынан.
– Яҙмышым баш­ҡа­ларҙы­ҡынан әллә ни айырылмай тиерлек. Урта мәктәп­те тамам­лағас, хәр­би бурысымды үтә­нем. Унан өйләндем, – ти Фәһим Камил улы. – Үҙебеҙҙең райондың Һабай ауылы һылыуы Фәриҙәнең ғәжәйеп һөйкөмлөлөгө, ҡара күҙҙәре, иңдәренә тулҡын-тулҡын булып ятҡан сәстәре күңелемде шунда уҡ әсир итте. Уның менән бер йыл самаһы аралашып йөрөнөк тә өйләнештек.
“Күп бала тыуҙырған ҡатын Раббыбыҙ ҡаршыһында һөйөк­лө”, – тиелгән хәҙистә. Аллаға шөкөр, Фәриҙәм һигеҙ сабыйға ғүмер бирҙе. Ғаиләнең бит ишле булыуы яҡшы: ундай мөхиттә үҫкән балалар ярҙамсыллығы, изгелеклелеге, ихласлығы менән айырылып тора. Ә динебеҙҙә, мәғлүм ки, был сифаттар юғары баһалана.
Фәһим Камил улы һәр бала­һын оло һөйөү менән телгә алды. Ул-ҡыҙҙары араһында, ҡыҙғаныс­ҡа ҡаршы, бик иртә баҡыйлыҡҡа күсеп, ата-әсәһен ҡара ҡайғыға һалғандар ҙа булған. Ағайҙың әле ун ике ейән-ейәнсәре бар, улар олатаһы янына йыш ҡайтып йөрөй.
– Ҡатыным күп йылдар элек фани донъяны ҡалдырып китте, – ти Фәһим Камил улы, көрһөнөп. – Элек ауылыбыҙҙа клуб, магазин, башланғыс мәктәп бар ине, хәҙер улар ҙа юҡ. Ун ике йортта 17 кеше йәшәп ятабыҙ. Күре­үе­геҙсә, ҙур өйөмдә яңғыҙ көн күрәм. Ишек алдына сығып инәм, ҡайһы саҡта ауылды әйләнеп сығам... Төйәгебеҙҙә мәсет булмауы йөрәкте әрнетә. Бала саҡ­тан Аллаһтың барлығына һәм бер­легенә ышанам, көндәлек мәшәҡәттәр араһында ла әхи­рәт­те онотмайым. Ҡөрьәнде көн дә өйрәнәм. Хаҡ юлға аяҡ ба­ҫыуҙың, намаҙ уҡыуҙың бәрәкәте сикһеҙ. Барыбыҙ ҙа шуға ынтылып йәшәһәк ине, иншаллаһ.

Силәбе өлкәһе.