Дәһшәтле Бөйөк Ватан һуғышы алыҫта тороп ҡалһа ла, уның буйынса тарихи дөрөҫлөктө асыҡлау һаман бара. Был хатта хоҡуҡи нормаларҙа ла сағылыш таба. Күптән түгел Дәүләт Йыйылышы – Ҡоролтай, Севастополде обороналау датаһының үҙгәреүенә ҡарап, айырым ҡанунға төҙәтмә индерҙе.

Һүҙ “Һуғыш, хеҙмәт һәм Ҡораллы Көстәр ветерандары тураһында”ғы Башҡортостан Респуб­ликаһы Законына үҙгәрештәр индереү хаҡында бара. Был ҡанун кемдәрҙе һуғыш ветераны итеп таныу һәм уларға өҫтәмәләр түләү, ташламалар биреүҙе билдәләй.
Закондың элекке тексында Севастополь ҡалаһын обороналау 1941 йылдың 5 ноябрендә башланған тип яҙылған һәм бөгөнгө ветерандар­ҙың ундағы һу­ғыш хәрәкәттәрендә ҡатнашыуы ла ошо датанан алы­на ине. Ләкин беҙҙең заман­дағы тикшеренеүҙәр совет ғәскәрҙәренең ғәмәлдә шул йылдың 30 октябрендә үк оборонаға күсеүен асыҡлаған. Был Баш Хәрби диңгеҙ базаһы коман­дующийының ҡоро ер оборонаһы буйынса урынбаҫары Гавриил Жуков­тың ошо датаға ҡа­рата әмере менән дә раҫлана икән. Тимәк, ҡану­ниәттәге үҙгәрешкә ярашлы, һуғыш ветераны дәрәжәһе 30 октябрҙән алып бирелергә тейеш.
Һис һүҙһеҙ, был тарихи ғәҙеллекте лә аяҡҡа баҫты­расаҡ. Билдәле булыуынса, герой-ҡала Севастополде обороналауҙы бер үк хәрби частар алып барған. Ҡа­ну­ниәттәге әлеге төҙәтмә ошо ғәрәсәттә 1941 йылдың 30 октябренән алып 5 ноябренә саҡлы ҡатнашҡан һәм бөгөн бик аҙ һанда ҡалған граждандарҙы яҡлауҙы күҙ уңында тота. Уларҙың ҡайһы береһе, мәҫәлән, ошо биш көн эсендә ҡаты яраланып, артабан демобилиза­цияланған булыуы ихтимал һәм, тәбиғи, был оборо­нала ҡатнашҡан яугир булып таныла алмаған.
Федераль ҡануниәткә ошондай уҡ үҙгәреш был­тырғы йыл аҙағында индерелде.