Ошо көндәрҙә Белоретта республика Стратегик тикшеренеүҙәр институтының граждандар инициативаһын өйрәнеү үҙәге хеҙмәткәре Рәфил Аҫылғужин менән осрашыу булды. Унда Белорет ҡалаһы хакимиәте башлығы Сергей Поляков, райондың финанс идаралығы хеҙмәткәрҙәре, предприятие-учреждениелар етәкселәре һәм территориаль йәмәғәт үҙидараһы әүҙемселәре ҡатнашты.


Кәңәшмәлә быйыл урындағы башлан­ғыстарға нигеҙләнгән ихата биләмәләрен төҙөкләндереү программаһын тормошҡа ашырыу мәсьәләләре ҡаралды. Был программа республикала быйыл ғына старт алды. Былтыр баш ҡалала “Өфө ихаталары” тип исемләнгән пилот проекты тормошҡа ашырыл­ғайны.
Программа нигеҙендә Белорет ҡала­һына республика бюджетынан 11 миллион 133 мең һум аҡса бүленәсәк. Барыбыҙға ла яҡшы таныш “Урындағы башланғыс­тарҙы яҡлау” программаһындағы кеүек үк, бында ла урындағы бюджеттың һәм халыҡтың ҡатнашыуы шарт итеп ҡуйыла. Атап әйткәндә, ҡала ултырағы бүленгән субсидия күләменең 15 процентын түләйә­сәк, ә халыҡ биш процентын күтә­рәсәк тип күҙаллана.
Программаға ярашлы, ихата­лар­ҙа балалар өсөн уйын комплекстары, спорт майҙансыҡтары төҙөү, автомобиль туҡтал­ҡалары булдырыу, йәйәүлеләр өсөн юлдар эшләү, асфальт түшәү, яҡтырт­ҡыс­тарҙы алмаштырыу, эскәмйә­ләр, беседкалар ҡуйыу, сүп-сар контейнерҙары урынлаштырыу эштәре ҡаралған.
Әйткәндәй, хәл ителәсәк мәсьә­ләләрҙе лә күп ҡатлы йорттарҙа йәшәгән кешеләр үҙҙәре билдәлә­йәсәк. Бының өсөн ихатала аныҡ ҡына нимә төҙөкләндереләсәге буйынса халыҡтың өстән ике өлөшө тауыш бирергә һәм өҫтә аталған сумманы йыйырға тейеш буласаҡ.
Республикала старт алған ихата билә­мәләрен төҙөкләндереү прог­раммаһын ҡала халҡының күтәреп алырына шик юҡ. Йәшәгән уры­ның­да уңайлы шарттар тыуҙырыу­ға үҙ өлөшөңдө индереп, хеҙмә­теңдең емешен татыуҙан бер кем дә баш тартмаҫ, тип ышанғы килә.