Гәзитебеҙҙең былтырғы йәй һандарының береһендә Йылайыр районының Шанский ауылы менән таныштырғанда, Кананикольск – Шанский юлының төҙөкләндерелә башлауы хаҡында яҙғайныҡ инде. Район үҙәгенән алыҫта ятҡан төпкөл ауылдарға юлдың булмауы халыҡ өсөн күптән баш бәләһенә әйләнгән. 60-сы йылдарҙа Кананикольск урман хужалығы һалған юл ваҡыт үтеү менән яраҡһыҙға әйләнә.


Район хакимиәте башлығы Илгиз Фәтҡул­линға шанскийҙар йылдар дауамында үҙ­ҙәрен борсоған хәл хаҡында еткергәс, Илгиз Лирман улы “юл буласаҡ” тип вәғәҙә бирә. Вәғәҙә үтәлә. Ниһайәт, төрлө ҡаршылыҡтар аша, һынауҙарҙы йыра-йыра райондың иң төпкөл ауылына юл һалына.
Юл төҙөү республиканың Ауыл хужалығы министрлығы аша хәл ителә. Төҙөлөштөң дөйөм хаҡы – 100 миллион һум. Сумманың яртыһы – федераль ҡаҙнанан, яртыһы республика иҫәбенән бүленә.
Юлды асыу тантанаһында Башҡортостан Транспорт һәм юл хужалығы буйынса дәүләт комитетының беренсе урынбаҫары Альберт Сөләймәнов, “Башҡортостан Республика­һы­ның юл хужалығы идаралығы” дәүләт ҡаҙна учреждениеһы етәксеһе урынбаҫары Азат Хафизов, Йылайыр районы хакимиәте баш­лығы Илгиз Фәтҡуллин һәм башҡа мәртәбәле ҡунаҡтар ҡатнашты.
– 2011 йылдан бойомға ашырылып килгән “Ауыл территорияларын тотороҡло үҫтереү” маҡсатлы программаһы буйынса республикала 64 яңы автомобиль юлы һалынды, һеҙҙеке – 65-сеһе, – тине үҙ сығышында Альберт Мөхәмәт улы.
Яңы йылда ҙур бүләккә эйә булған Шанский ауылы халҡының ҡыуанысы ҙур. Хәҙер уларға “юлдар, юлдар соҡор-саҡырлы” тип түгел, “Эй, юлдары, юлдары!..” тип йырлап, елдереп кәрәкле урындарға барып етергә генә ҡала.