Сибайҙар “Урындағы башланғыстарҙы яҡлау” программаһына алты проектты тәҡдим итә, һәм шуларҙың бөтәһе лә еңеп сыға. Проекттарҙың дөйөм хаҡы
4 миллион 956 мең 029 һум тәшкил итә. Ҡала хакимиәтенең мәғариф бүлеге етәксеһе Ғаяз Хәсәнов әйтеүенсә, проекттарҙың барыһы ла тиерлек мәғариф бүлеге учреждениеларының, спорт һәм сәнғәт мәктәптәренең биналарына ремонт эшләүгә ҡайтып ҡала.

Халыҡтың белем усаҡтарын яңыр­тыу маҡсатында дәррәү тауыш бире­үе хуплауға лайыҡ. Йылдар дауамында йыйылып килгән проблема­ның бер йыл эсендә хәл ителеүенә үҙебеҙ ҙә хайран ҡалдыҡ, ти сибай­ҙар.
Әгәр ошоға тиклем был программала район ауылдары ғына ҡатнаша алһа, ике йыл рәттән ҡала ерендә йә­шәүселәр ҙә тауыш биреп, проект­ты һайлау мөмкинлеге алды. Әйт­кән­дәй, ҡала халҡы быйыл да “Урындағы башланғыстарҙы яҡлау” программаһында әүҙем ҡатнаша. Тап ошо көндәрҙә һәр урында, ойошма­ларҙа үҙҙәрен борсоған мәсьәлә­ләр­ҙе күтәргән төрлө проекттар тәҡ­дим ителә, халыҡ хөкөмөнә сыға­рыла.
Төйәләҫ ҡасабаһы, ике йыл рәттән программала ҡатнашып, һис тә отол­маны. Үткән йыл улар мәктәптә өлөш­ләтә капиталь ремонт яһай. Ҡа­ланың иң тәүге белем усаҡта­ры­ның береһе – 1-се мәктәптең фасады өр-яңы төҫ ала, 8-се мәктәптең иҫке ағас тәҙрәләре яңыларына алмаштырыла. 14-се мәктәп уҡыусыла­ры­на хәҙер физкультура дәресендә хә­үефләнергә кәрәкмәй, сөнки спорт залы бар талаптарға ярашлы йыһаз­ландырылған.
Күренеүенсә, сибайҙар былтыр “Урындағы башланғыстарҙы яҡлау” программаһында бик әүҙем ҡатнаш­ҡан. Йылдар буйы хәл ителмәгән мәсьәләләр халыҡтың әүҙемлеге һәм ышанысы арҡаһында аҡрынлап булһа ла тормошҡа ашыуы – үҙе үк программаның кәрәклеген раҫлаған асыҡ миҫал. Быйыл да ҡала халҡы һынатмаҫ, иң кәрәкле проекттар өсөн тауыш бирер, тип ышанғы килә.