“Шүлгәнташ” дәүләт тәбиғәт ҡурсаулығын ЮНЕСКО Бөтөн донъя мираҫының исемлегенә индерергә тәҡдим ителде, тип хәбәр итте Башҡортостан Республикаһындағы ЮНЕСКО эштәре буйынса комитеттың башҡарма директоры Өлфәт Йомағужин “Йәмәғәт электрон гәзите”ндәге онлайн-конференцияла.
— ЮНЕСКО-ның Париждағы штаб-фатирынан ошо тәбиғи һәм мәҙәни мираҫ объектын Бөтөн донъя мираҫы исемлегенә индереү тәҡдиме хаҡында хәбәр килде, — тине Өлфәт Йомағужин. — Беҙ ошо юлды яртылаш үттек тиерлек.
Ҡурсаулыҡ Бөтөн донъя мираҫының даими исемлегенә индерелһә, “Шүлгәнташ” халыҡ-ара һаҡ аҫтына алынасаҡ. Башҡортостан менән Рәсәй етәкселегенә финанс, ғилми һәм мәғлүмәти-мәҙәни ярҙам саралары күреү буйынса тәҡдимдәр ебәреләсәк. Был, үҙ сиратында, республикаға туристарҙы, эшлекле даирәләрҙе йәлеп итеү мөмкинлеген бирәсәк. Ҡурсаулыҡ тирәләй урындағы халыҡ менән “хеҙмәттәшлек зонаһы” ойоштороласаҡ. Унда урындағы халыҡ емеш-еләк йыясаҡ, бесән сабасаҡ.
Рәсәй буйынса ЮНЕСКО-ның Бөтөн донъя мираҫы исемлегенә 21 объект, шул иҫәптән Мәскәү Кремле, Санкт-Петербургтың тарихи үҙәге, Ҡазан Кремле, Коми урмандары, Алтай тауҙары ингән.