Дәүләт автомобиль инспекцияһының бер ай самаһы элек кенә үҙ көсөнә ингән “Административ регламент”ы тураһында һуңғы арала күп һөйләйҙәр һәм яҙалар. Ни өсөн ул ҙур бәхәс тыуҙырҙы һәм беҙгә, автомобиль йөрөтөүселәргә, ниндәй үҙгәрештәр вәғәҙә итә?

Күптәр юлдың ваҡытлы тамғалар ҡуйылған өлөш­тә­рендә видеокамералар беркетеүҙе көтөлмәгән хәл тип күрһәтә. Элекке регламентта был тыйыла ине һәм юҡҡа ғына түгел: юлды йүнәткән урында, мәҫәлән, ав­томобилдә былай ҙа юғары тиҙлектә барыу мөмкин түгел. Шуға күрә шоферҙар ундай осраҡта ғәмәлдәге хәл­гә ҡарап эш итә ине: ремонтсылар һәм уларҙың тө­ҙөлөш материалдары янынан уҙғанда тиҙлекте ҡырҡа кәметәләр, иғтибарҙы арттыралар, ә эшләнеп бөткән юлда һаман эленеп торған һәм мәғәнәһен юғалтҡан ваҡытлыса тамғаларҙы күҙгә лә элмәйҙәр ине. Әммә яңы регламентта бындай тыйыу төшөп ҡалған. Тимәк, был тамғалар эленеп торғас һәм видеокамералар тиҙ­лекте кәметмәй барған машиналарҙы “эләктереүен” дауам иткәс, штраф йыйыуҙы ла туҡтатмаҫҡа мөмкин – ҡануниәт күҙлегенән бында бәйләнергә урын юҡ. Дө­рөҫ, әлеге мәлдә юлдың ундай урындарында видеокамералар юҡ. “Ләкин ҡаҙнаға штрафты күберәк йыйыу зарурлығы ла һаҡлана бит әле”, – тип раҫлай эксперттар.
Йәмәғәтселектә ризаһыҙлыҡ тыуҙырған тағы бер шарт: ошо уҡ регламентта автоинспектор үҙе туҡтатҡан машина хужаһы менән һөйләшеүҙе шоферҙың йәки уның эргәһендәге пассажирҙың видеокамераға төшө­рө­үен тыйырға хоҡуғы булмауы тураһындағы юлдар ҙа ни өсөндөр юҡҡа сығарылған. Дөрөҫ, ҡануниәт бел­гестәре яҙыуынса, “видеоға төшөрөргә ярамай” тип был документта туранан-тура әйтелмәгән – тимәк, хә­ҙер автоинспекторҙың да “төшөрөүҙе туҡтатығыҙ” тип әйтеүен һис кем тыя алмай бит. Тыйылмай икән – рөх­сәт ителгән. Автоинспекторҙың талабын үтәмәгән өсөн, Административ хоҡуҡ боҙоуҙар тураһындағы кодекстың 19.03-сө статьяһында билдәләнгәнсә, 15 тәүлеккә иректән мәхрүм итеүҙәре лә ихтимал. Кем хаҡлы – тыйыламы, юҡмы?
Күптән түгел Рәсәй Дәүләт Думаһында ла ошо мәсьә­ләне күтәреп сыҡтылар. Депутат Ярослав Ниловтың баш­ланғысы менән был бәхәскә сик ҡуйылды: уның рәсми мөрәжәғәтенә яуап итеп, Рәсәй Эске эштәр ми­нистр­лығының Юл хәрәкәте хәүефһеҙлеге баш ида­ралығы түбәндәге аңлатманы бирҙе: “Полиция хеҙмәт­кәренең юл хәрәкәтендә ҡатнашҡан граждандарҙың хоҡуҡтарын һәм законлы мәнфәғәтен күҙәтеү буйынса бурыстары Административ регламенттың 7.2-се һәм 45-се пункттарында нығытылған. Полиция хеҙмәткәренә юл хәрәкәтендә ҡатнашҡандарҙың фото-, видео- һәм та­уыш яҙҙырыу ҡорамалын файҙаланыуын Рәсәй Фе­де­рацияһы ҡануниәтендә ҡаралған нигеҙҙәрҙән тыш ты­йырға мөмкинлек биргән ҡағиҙәләр был документта юҡ”.