Бынан 90 йыл элек – 1927 йылдың 7 ноябрендә – Башҡортостандың репродуктор урынлаштырылған төрлө майҙандарында, клубтарында, китапханаларында тәүге тапҡыр “Алло, алло! Өфө һөйләй!” тигән һүҙҙәр яңғырай. Ул заманда был ҙур ваҡиға була: халыҡ майҙандарға йыйылып тыңлай, фекере менән уртаҡлаша. Эйе, ул саҡта радио мөғжизә кеүек ҡабул ителә.

Шул мәлдән радио мөһим ваҡи­ғаларҙы халыҡҡа ишеттергән төп мәғлүмәт сараһы булып ҡала. Бөгөн дә тормошобоҙҙо унһыҙ күҙ алдына килтерә алмайбыҙ.
– 70-се йылдарҙа республика район­дарында хәбәрселәр пункттары асыла башланы. Мин дә 1974 йылда Ғафури районында диктор булдым. 16 йыл ғүмеремде ошо мәғ­лүмәт сараһына бирҙем. Радио хеҙмәтен үткән журналист бөтә ерҙә лә эшләй ала. Телевидениеға ла күптәр ошо мәктәптән килә, – ти журналистика ветераны Шәүрә Ғилманова.
Халыҡ та радионы үҙ итә. Мәҫә­лән, Өфөнөң Чесноковка биҫтәһенән 70 йәшлек Валерия Васюк: “Радио кәрәк. Миңә, радиоңды сығарып ташла, тип әйтеүселәр ҙә бар. Нисек таш­лайһың инде? Киреһенсә, ул һәр йортта булырға тейеш. Ҡапыл берәй хәл була ҡалһа, нисек беләбеҙ?” – ти.
Кисә Башҡортостан радиоһы­ның 90 йыллыҡ юбилейы айҡанлы Башҡортостан дәүләт телерадиоком­па­нияһында тантаналы сара үтте. Республиканың Матбуғат һәм киң мәғлүмәт саралары агентлығы етәксеһе Борис Мелкоедов Баш­ҡортостан Башлығы Рөстәм Хәми­товтың ҡотлау һүҙҙәрен еткерҙе. Ә Рәсәй ДТРК-һының Башҡортостан­дағы филиалы генераль директоры Азамат Сәлихов: “Башҡорт радиоһы инешендә торған бөтә хеҙмәткәр­ҙәрҙе лә, тарихын да иҫтә тотабыҙ. Был радионы булдырған барлыҡ кешеләр алдында баш эйәбеҙ. 90 йыл, әммә әле барыһы ла яңы башлана ғына. Киләсәктә лә Башҡортос­тан радиоһы үҫешһен”, – тине.
50 йыл радиола эшләгән рес­публиканың халыҡ артисы Наилә Ғәләүетдиноваға һәм Азамат Сәли­ховҡа телеүҙәк фасадында Башҡорт­остан радиоһының тәүге тапҡыр эфирға сыҡҡан көнөнә арналған таҡтаташты асыу хоҡуғы бирелде.
Артабан байрам сараһы телеүҙәк бинаһында дауам итте. Сентябрҙә ошо юбилейға арнап ойошторолған “Автомобиль бүләк итәбеҙ” конкурсына йомғаҡ яһалды.