Уңайлы мөхит – ҡалалағы пандустар ғына түгел, тәү сиратта ҡулайлы коммуникациялар ҙа ул. Күптән түгел Өфөлә ойошторолған “Хәстәрлек” социаль ярҙам хеҙмәте тәүлек әйләнәһенә эшләй.
Сымһыҙ элемтә нигеҙендәге система өлкән­дәргә, инвалид­тарға, шул иҫәптән һаңғырау йә насар ишеткән кешеләргә социаль һәм медицина хеҙмәте күрһәтеүгә йүнәлтелә. Был хеҙмәт 14 йыл элек Санкт-Петербургта барлыҡҡа килгән. Әле иһә филиалдары 12 төбәк­тә, шул иҫәптән Башҡорт­останда ла эшләй. Хеҙмәтлән­дереү хаҡы – айына 700 һум. Әммә тәүге йөҙ кешегә бушлай хеҙмәт күрһәтергә ниәтләйҙәр. Бөгөн Өфөнән 60 пенсионер системаға ингән. Ишетеү һәлә­тендә кәмселектәре булған граждандар түләүһеҙ хеҙмәт­ләндерелә, шуға күрә теләге булған һәр кеше бында мөрә­жәғәт итә ала.
“Хәстәрлек системаһы” Ғаилә, хеҙмәт һәм халыҡты социаль яҡлау министрлығы инвалид­тарҙың ошо категория­һын диспетчер ярҙамы менән тәьмин итеү буйынса үткәргән конкурста еңеп сыҡты. Бындай кешеләргә +7(961)362-95-46 телефон һанына sms-хәбәр, ufa@zabota365.ru электрон почтаһына, +7(495) 120-11-62 факс номерына хат ебәреү мөмкинлеге бар. Сурдо­тәржемәселәр Skype sistemazabota102 аша видеошылтыра­тыу­ҙарҙы һәм Telegram zabota102 мессенджерында мөрә­жәғәттәрҙе ҡабул итә.
Өлкәндәр “Хәстәрлек” систе­маһына инеү өсөн килешеү төҙөргә тейеш. Унда пенсионер, уның сирҙәре тураһында ентек­ле мәғлүмәт, туған­да­рының телефон һандары индерелә. Клиенттың мобиль ҡулайла­ма­һына хәүеф төймә­һе ҡуйыла. Бәйләнештең икенсе осондағы оператор, хәлде тейешенсә баһалағандан һуң, кәрәкле ярҙамды (“Ашығыс ярҙам”ды, полицияны, янғын һүнде­реү­селәрҙе, ғәҙәттән тыш хәлдәр вәкилдәрен, авария хеҙмәтен) саҡырта. Абонентҡа ярҙамды үҙенә хәстәрләүҙең кәрәге юҡ, быны операторҙар башҡара. Диспетчерҙар мөрә­жә­ғәт буйынса дәүләт власы органдары белгестәре менән бәйләнешкә инә, тейешле мәғлүмәтте тапшыра, табипҡа ҡабул итеүгә яҙҙырта.
– Өлкәндәр һәм көн һайын ярҙамға мохтаж булған кеше­ләр әүҙем тормош алып бар­һын, ҡартлығы, ауырлыҡтары менән яңғыҙ ҡалмаһын ине, – ти “Хәстәрлек” системаһының Башҡорт­остандағы рәсми вә­ки­ле Лилиә Евстафьева. – Ҡай­һы саҡта кеше аралашҡыһы, һауа торошон, афишаларҙы белгеһе килә. Яңғыҙ граждан­дар­ҙың өйөндә булғаным бар. Беҙҙең хеҙмәт уларға бик кәрәк. Балалары хәстәрлек күрһәтһә лә, ҡайһы берҙә уларҙың да иғтибары етмәй. Мәғ­лүмәт базаһына 1932 йылғы һәм унан олораҡ граждандар индерел­гән. Улар даими шылтырата. Мәҫәлән, күптән түгел өлкән йәштәге ҡатын бейергә өйрә­нер­гә теләк белдерҙе. Опера­торҙар уның өсөн студия тапты. Йәки тағы ла бер ваҡиға: йөрәк сирле ир хәүеф төймәһенә баҫып өлгөргән һәм аңын юғал­тып йығылған. Опе­раторҙар шунда уҡ “Ашығыс ярҙам”, фа­тирҙың ишеген астырыу өсөн слесарь саҡыртҡан, пенсио­нер­ҙың ҡыҙы менән бәйлә­нешкә ингән.
Шул уҡ ваҡытта ойошма белгестәр саҡыртыу менән генә сикләнеп ҡалмай, ярҙам күр­һә­теү башынан аҙағына тиклем контролдә тотола: слесарь килгәнме, эшен башҡарғанмы, хаҡты тейешенән артығыраҡ алмағанмы һ.б.
Хеҙмәттең Баш­ҡорт­остан­дағы вәкиллеге менән бәй­ләнешкә инеү өсөн телефон: 8(917)4730499.