Коми Республикаһында быйыл май айында ғына ойошторолған Башҡорт милли-мәҙәни автономияһы “Регион добрососедства” республика конкурсында ҡатнашып, Сыктывкарҙа Башҡорт мәҙәниәте көндәре үткәреүгә 70 мең һумлыҡ грант отто.

Сара быйыл 15–17 ноябрҙә үтергә тейеш. Сыктывкар башҡорттары Коми халҡын төп уйын ҡоралыбыҙ ҡурай менән таныштырырға, Башҡортостан рәссамда­ры­ның картиналарынан күргәҙмә ойошто­рорға йыйына. Ойошма етәксеһе Рәүҙәт Ниғмәтуллин әйтеүенсә, Башҡортостандан ижади делегация килеүе көтөлә.

***

Ҡурған, Силәбе өлкәләренә экспедиция әҙерләнә.

“Көнсығыш диалекттың телмә­рен йы­йырға ине иҫәп. Был төбәккә ҡара­ған һөйләштәрҙең барыһы ла ҡыҙыҡлы. Тупланған аудиоматериал нигеҙендә башҡорт диалекттарының телмәр корпусын төҙөргә йыйынабыҙ”, – тине Рәсәй Фән­дәр академияһы Өфө ғилми үҙәгенең Тарих, тел һәм әҙәбиәт институтының өл­кән ғилми хеҙмәткәре Зиннур Сиражетдинов.
Зиннур Әмир улын күптәр белмәһә лә, уның хеҙмәте киң йәмәғәтселеккә яҡшы таныш: ул – Башҡорт теленең машина фон­дын, Башҡорт терминологияһы базаһын эшләгән телсе-ғалим.

***
Ҡоролтайға йылы осрашыуға Ук­раина­­­ның Харьков ҡалаһынан милләттәшебеҙ Миңлефәрзәнә Мөхәррәм ҡыҙы Олейник килде.
Харьков ҡалаһында эшләп килгән “Ҡоролтай” башҡорт мәҙәни үҙәге Украина­лағы ҡәрҙәштәрҙе берләштерә. “Берҙәм булырға, туған телде, мәҙә­ниә­тебеҙҙе һаҡларға тырышабыҙ. Ҡырым­дағы, бөтөн Украиналағы башҡорттар менән аралашып йәшәйбеҙ”, – ти Миңлефәрзәнә Мөхәррәм ҡыҙы.
Ҡоролтайҙың төбәктәр менән эшләгән баш белгесе Алһыу Сирғәлина яҡташы­быҙға методик ярҙам күрһәтте, китап-әсбаптар һәм фольклор ансамблдәренә милли костюмдар тапшырҙы.