“Башҡортостан” дәүләт биг-бэнды — “Sochi Jazz Festival” халыҡ-ара джаз фестивалендә Башҡорт дәүләт филармонияһы коллективын ошолай тип таныштырҙылар. Өфөләр ошо сарала фестивалдең президенты джазмен Игорь Бутмандың саҡырыуы буйынса ҡатнашты.
— Башта беҙҙе белмәйҙәр ине. Әммә сығыш яһағандан һуң музыканттар ихтирам менән “фестиваль фавориттары” тигән баһа бирҙе, ә Игорь Бутман иһә: “Шәп оркестр, миңә лә шундай коллектив кәрәк ине!” — тине.
– Үҙебеҙҙе Рәсәй кимәлендә һынап ҡараныҡ, — тине биг-бэнд етәксеһе, Башҡортостандың атҡаҙанған артисы Олег Ҡасимов сәфәр һөҙөмтәһе буйынса ойошторолған матбуғат конферен­цияһында.
Өфө артистары диңгеҙ ярында үткән парадта ҡатнашты, фестивалдең төп майҙансығында — “Фестивальный” концерт залында сығыш яһаны. Сочи тамашасылары араһында джаз һөйөүселәр бик күп ине. Олег Ҡасимовтың “Джаз мәҙәктәре” тигән авторлыҡ программаһы ҙур ҡыҙыҡһыныу уятты. Программала солистар Сиявуш Шермат-заде, Полина Кобец, Екатерина Ямщикова, ҡурайсы Илнур Хәйруллин ҡатнашты. “Көн­сығыш риүә­йәттәре” композицияһында ҡурай менән саксофондың бергә уйнауы тамаша­сыларҙы айырыуса әсир итте.
Олег Ҡасимовтың үҙенсәлекле кескәй музыкаль ваҡиғалары — “Джаз мәҙәк­тәре” проекты 2015 йылда Башҡортостан Республикаһы Башлығы грантына лайыҡ булғайны. Бөтә музыканы Олег Ҡасимов яҙған, рус һәм инглиз текстарын Альбина Әхмәт­йәнова ижад иткән.
— Программа бик бай, һәр кем күңеленә хуш килерлек музыканы таба ала. Ҡыҙыҡлы мәлдәр, төрлө стилдәр бихисап. Бында импровизация ла, фанк та, латино ла, классика ла, бибоп та бар, — тине солист Сиявуш Шермат-заде.
Башҡортостан музыканттарының сығышы Сочи телевидениеһы репортажына инде. Коллективтың киләсәккә пландары ҙур, көҙ Өфө джазмендары Екатеринбургта һәм Ырымбурҙа авторлыҡ программаһы менән сығыш яһарға ниәтләй. Шулай уҡ Пермдә оупен-эйр программаһында ҡатнашыу буйынса һөйләшеү алып барыла. Башҡортостан­дың баш ҡалаһы халҡы иһә уларҙы 12 сентябрҙә Башҡорт дәүләт филармония­һының бәләкәй залында күреү мөмкинлегенә эйә. Унда “Свинг корол­дәре” программаһы тәҡдим ителәсәк.
Әйткәндәй, Игорь Бутмандың фес­тивале Сочиҙа 2010 йылдан үткәрелә. Ул элегерәк “Акваджаз” тип атала ине. Сараның географияһы бик киң — Мәскәүҙән, Европанан, Американан музыканттар килә. Фестивалдә танылған музыканттар сығыш яһап ҡына ҡалмай, оҫталыҡ дәрестәре, ижад кисәләре уҙғарыла.