Ошо көндәрҙә Тәүәкән ауылында йәшәгән тыл ветераны Шәрифә Ҡаразбаева 100 йәшлек олпат юбилейын билдәләне. Ауылдаштары йөҙйәшәр инәйҙе өлкән йәштә булғаны ғына түгел, кешелеклелек, кеселеклелек сифаттары өсөн дә хөрмәт итә.


Күңел көрлөгөн, зиһен теүәл­леген юғалтмаған ағинәйҙе тәүге­ләрҙән булып район хакимиәте башлығы Ғайса Янбаев ҡотланы, сағыу сәскәләр, бүләктәр тап­шырҙы. Ул юбилярға шулай уҡ Рәсәй Президенты Владимир Путин менән республика Башлығы Рөстәм Хәмитовтың да Ҡотлау хаттарын, бүләктәрен еткерҙе.
Шәрифә Ғәтиәт ҡыҙы – күп һынауҙарҙы үҙ иңендә күтәргән көслө быуын вәкиле. Юғары дәрәжәләге етәкселәрҙең уға ҙур иғтибар күрһәтеүе бик тә урынлы һәм дөрөҫ.
– Хөрмәтле Шәрифә Ғәтиәт ҡы­ҙы, һеҙ — ғүмер юлығыҙ, йәшә­йе­шегеҙ менән беҙгә үрнәк. Ғаи­ләгә булған хәстәрлек, намыҫлы хеҙмәт, яуаплылыҡ, әҙәплелек – өлкән быуын кешеләренең төп һыҙаттары. Фиҙакәрлегегеҙ өсөн рәхмәт белдерәбеҙ һәм ныҡлы һаулыҡ теләйбеҙ, – тине юбилярға район хакимиәте башлығы.
Тотош быуат ваҡиғаларына шаһит булған мөләйем инәйҙең барлар хәтирәләре бик күп. Уның хеҙмәт юлы бик иртә – 14 йәштә генә — башланған. Аслыҡ йылдарында нисек тә иҫән ҡалыу өсөн тиңдәштәре менән башта Силәбе, аҙаҡ Магнитогорск, Сибай яҡта­рына сығып китергә мәжбүр була. Һуғыш йылдарында иһә Баймаҡта торф сығарыуҙа эшләй. Аслыҡ-яланғаслыҡҡа, ауыр хеҙмәткә, һуғыш йылдары һынау­ҙарына баш эймәгән улар... Өлөш итеп бирел­гән шырпы ҡабы ғына ҙурлыҡ икмәк һәм йәшел төҫтәге үлән һурпаһы менән тамаҡ туйҙырып йөрөгән саҡтарын иҫкә алғанда, һаман да күҙҙәренә йәштәр тула. Оҙон тормош юлында бик күп ауырлыҡ аша үтергә, бәләләр, ҡайғылар кисерергә тура килә уға. Ире, фин һәм Бөйөк Ватан һуғышы ветераны Ғәйнулла Рәсүл улы тормоштан бик иртә – 57 йәшендә генә — киткәс, өс балаһын яңғыҙ аяҡҡа баҫтырған, уларға лайыҡлы тәрбиә биргән. Яугирҙең тол ҡа­тыны һәм тыл ветераны булараҡ, дәүләт инәйгә торлаҡ биргән. Бөгөн уның төп ҡыуанысы – балалары, ете ейәне, 12 бүлә-бүләсәре. Әйткәндәй, ире менән биш бала үҫтергән ейән­сәре Лена күптән түгел “Әсәлек даны” миҙалы менән бүләкләнгән.
Шәрифә Ғәтиәт ҡыҙы тыумышы менән Түбәнге Сирбай ауылынан. Хәтере яҡшы, матур күрә, асыҡ күңел­ле һәм тормошто ярата, мәрәкәсел.
– 100 йәшкә етһәм дә, бизнес менән шөғөлләнәм әле, — ти ул, мут йылмайып.
Баҡтиһәң, ул ҡайын туҙынан ҡара һағыҙ ҡайната, экологик яҡтан таҙа, хуш еҫле был тәмле­кәсте башҡа яҡтарҙан да килеп алалар икән. Хатта Башҡортостан телевидениеһынан килеп, уның һағыҙ ҡайнатыу серен видеоға төшөрөп алып киткәндәр.
Тормош көтөү – баҫыу кисеү түгел, тиҙәр. Атҡан һәр таңға ҡыуа­ныу, яҙмыш һынауҙарына фәл­сәфәүи күҙлектән бағыу, донъя­ның ыңғай яҡтарын күреү һәләт­тәре уны көслө иткән, рухын байытҡан.
– Елдәй елеп үткән был йыл­дарҙы һиҙмәй ҙә ҡалдым, – ти бер быуатлыҡ ғүмер кисергән юбилярыбыҙ.
Ғүмер юлығыҙҙы артабан да һау-сәләмәт булып барлағыҙ, Шәрифә инәй. Һеҙ бит оҙон ғүмерлеләр ырыуынан. Йөҙ йылдан ашыу ғүмер иткән атайығыҙ һәм өләсәйегеҙ кеүек, тағы ла оҙон-оҙаҡ йәшәргә яҙһын!