Ошо көндәрҙә Өфө дәүләт нефть техник университетының йөҙ меңенсе студенты ҡулына диплом алып ҡыуанды. Бәхетленең ҡунағы ла бер көндә тигәндәй, иҫтәлекле сараның башҡорт нефтенең 80 йыллығын билдәләгән осорға тура килеүе әһәмиәтле. Ни тиһәң дә, бөгөн уҡыу йортон тамамлаған белгестәр Рәсәйҙең генә түгел, донъя­ның нефть-газ компаниялары элитаһын тәшкил итә.

“Һеҙҙең вузығыҙ, ысынлап та, ҡәҙимге түгел – иң көслө тармаҡ­тарға белгестәр әҙерләй­һегеҙ, ә был – ҙур яуап­лылыҡ. Яҡшы белгес – уңыштың яртыһы”, – ти­гәйне ил Президенты Владимир Путин 2003 йылда университеттың про­фессорҙары менән осрашыуында. Ысынлап та, ҡасандыр йылына 14 кенә белгес әҙерләгән уҡыу йор­тон һуңғы йыл­дарҙа меңәр­ләгән ҡыҙ һәм егет тамамлай. Әй­тәйек, быйыл Өфө дәү­ләт нефть техник университеты дипломы 4650 кешегә тапшырылған. Шу­лар­ҙың 191-е – донъя­ның 26 иле­нән килгән вәкилдәр. Ә үрҙә телгә алынған йөҙ меңенсе дипломды иһә Рөстәм Ильин алды. Ул “Орга­ник матдәләрҙең химик техноло­гиялары” йүнәле­ше буйынса ба­ка­лавриат тамамлаған. Артабан уҡы­уын магистратурала дауам итмәксе.
“Бөгөн оло тормошҡа йүнәлтмә алаһығыҙ. Һеҙ — университеттың авангарды. Үҙегеҙҙең тырыш­лығы­ғыҙ, ныҡышмалы­лығығыҙ, һәләтегеҙ ме­нән был дипломға лайыҡ булы­уығыҙҙы иҫбат итте­геҙ. Быйыл уҡыу йортон тамамлаған сығары­лыш студенттарының һаны 100 мең­дән ашты. Был да – ҙур бер күр­һәткес һәм ҡаҙаныш”, – ти­не уҡыу йортоноң ректоры Рәмил Бәхтизин.
Йәштәрҙе Башҡорт­остан Рес­пуб­ли­каһының Премьер-министр урын­баҫары Фәрхәд Самедов та ҡотланы: “Профессионал булыр өсөн ғүмер бу­йы уҡырға кәрәк. Уңыш­тар һеҙгә!” – тине ул тәб­рикләү телмәрендә һәм һуңғы йылдарҙа технологик үҫештең белем биреүгә яңы талаптар индере­үен һыҙыҡ өҫтөнә алды, универси­теттың юғары статуслы бел­гестәр әҙерләүен бил­дәләне.