Күпләп ҡош тотҡандарҙы тауыҡ, ҡаҙ, өйрәктәренең ауырыуы борсой. Был тармаҡта ла, медициналағы һымаҡ, сирҙе иҫкәртеү яҡшыраҡ тигән принцип йәшәй. Шуға ла даими рәүештә санитар ҡағиҙәләрҙе үтәү мөһим. Ҡанатлыларҙың һаулығын нығытыу маҡсатында башҡа саралар ҙа үткәрелә.
Ҡоштарҙы урынлаштырыу алдынан улар өсөн шарттар тыуҙырылған “торлаҡ” әҙерләргә кәрәк. Элекке аҫ­тын алыу зарур. Иҙәне булһа, уны йыуып сығаралар. Дезинфекция өсөн ике процентлы каустик сода кәрәк. Стеналарҙы һәм түбәне яңы ғына иретелгән эзбиз менән ағар­алар. Бының өсөн 10 литрлыҡ биҙ­рәгә 2,8 килограмм эзбиз һалалар.
Ҡоштарҙы урынлаштырыу алдынан аҫтарына һалам, ағас онтағы йәйәләр. Йәй 5-6 сантиметр ҡалын­лыҡта булһа, ҡыш 10-15 сантиметр һалалар. Йәйелгән аҫтынан дымлы­лығын гелән тикшереп торалар. Ул 25 проценттан артырға тейеш түгел. Шуға ла даими рәүештә алыштыралар. Ә йомортҡа өсөн тотолған та­уыҡтарға өҫтәмә рәүештә ағас көлө лә ҡуялар. Ул төрлө паразиттарҙан һаҡлай.
Үҫтереү өсөн себештәрҙең тик һауҙарын ғына һайлайҙар. Уларҙың аппетиты яҡшы, үҙҙәре әүҙем булыр­ға тейеш. Тәүге тәүлектәрендә аҡ­һыл ал төҫтә итеп марганцовка ла бирәләр. Шулай уҡ һәр баш иҫәбенә ике грамм глюкоза һалалар. Уныһы себештәрҙең организмын нығытыу өсөн эшләнә.
Дезинфекция өсөн ҡулланылған матдәләр:
Көл һелтәһе. Уны әҙерләү өсөн 10 килограмм ағас көлөн ошо уҡ күләмдәге һыу менән бутайҙар ҙа 1,5-2 сәғәт ҡайнаталар. Шунан һуң иҙмәне тондоралар. Әҙерләнгән ҡатнашманы 1:3 иҫәбенә эҫе һыу менән ҡатнаштыралар.
Хлорлы эзбиз. Көслө тәьҫир итеүсе иҙмә әҙерләү өсөн 5 литр һыуға 300 грамм, ә аҙ тәьҫирлеһенә ошо уҡ күләмдәге һыуға 200 грамм эзбиз һалалар. Уны бинаны һәм ҡорамалдарҙы дезинфекциялау өсөн ҡулланалар. Шыйыҡса тик ағас материалдарына ғына ярай.
Формалин. Шыйыҡса әҙерләү өсөн 150-250 грамм формалинды биш литр һыуға ҡушалар. Ул әҙерләгәс тә ҡулланыла.
Креолин. Шыйыҡса яһау өсөн 150-250 грамм креолинды биш литр һыуға ҡушалар.