Ҡасандыр Баймаҡта китап магазинының гөрләп торған сағы бар ине. Ул ябылғандан һуң рухи көрсөк кисерҙек. Белем шишмәһе булған китапһыҙ тормошобоҙҙо күҙ алдына ла килтереүе ҡыйын. Юғары мәҙәниәтле халыҡ ҡына илен күтәрә, үҫтерә ала. Ә был сифаттың нигеҙе, рухиәттең ҡалҡаны – китап. Район башҡорттары ҡоролтайының ҡарарына нигеҙләнеп, З. Биишева исемендәге “Китап” нәшриәте ярҙамы менән күптән түгел “Баймаҡ” сауҙа комплексында “Башҡорт китабы” тигән һатыу урыны асылды.
Район башҡорттары ҡо­ролтайы рәйесе Ришат Ишем­бәтов: “Туған телдә сыҡҡан баҫмалар һатыуҙы тергеҙергә кәрәклеге тураһында һөйләш­кәйнек. Яңылбикә Мөхәмәт­йә­нованың тәҡдиме менән З. Биишева исемендәге “Китап” нәшриәтенә бәйләнешкә сыҡ­тыҡ, директоры Илһам Йән­дәүләтов ярҙам итергә һүҙ бир­ҙе. “Баймаҡ” сауҙа комплексы етәксеһе Әҙһәм Ҡо­тоевҡа рәхмәт – ошонан урын бүлде”, – тип ҡыуанысы менән уртаҡлашты. Артабан яҡта­шыбыҙ, “Китап” нәшриәте директоры Илһам Миңлеғәле улы был мәсьәләнең күптән өлгөрөп еткәнен билдәләне.
– Рамаҙан айында матур ваҡиғаның шаһиты булдыҡ,– тине ул. – Республикала сыҡ­ҡан китаптарҙың 70 проценты беҙҙә баҫыла. Хөкүмәт махсус субсидия бүлә, шуға күрә баҫмаларҙың хаҡы арзан. Беҙ нәшриәттә сыҡҡан һәр яңы китапты ебәреп торорға вәғәҙә бирәбеҙ. Магазиндарҙың яҙмышы һатып алыусынан тора, шуға күрә бында йышы­раҡ килегеҙ, таныштарығыҙға, туғандарығыҙға мәғлүмәт еткерегеҙ.
Артабан район хакимиәте башлығының социаль мәсьә­ләләр һәм кадрҙар сәйәсәте буйынса урынбаҫары Гөлшат Сирғәлина сауҙа урынын “Китап” нәшриәтенең филиалы” тип нарыҡланы, уға оҙон ғүмер, уңыштар теләне.
Китапты ике кеше тыуҙыра – ижадсы һәм уҡыусы. Беҙҙең район ижадсылары “Йәнгүҙәй” исемле әҙәби берекмәгә туп­ланған. Уның эшмәкәрлегенә киләһе йыл 20 йыл тула. Улар үҙҙәренең тәүге ижадын “Ирәндек гәүһәрҙәре” исемле йыйынтыҡта сығарҙы. Шунан рухланған байтаҡ ижадсылар – тарихсы Борис Хәйретдинов, шағирә, тыуған яҡты өйрә­неүсе Рәйсә Иҫәнбаева, әсе телле Әлфиә Юлыҡ, нескә хисле Әлфиә Бикташева, шулай уҡ республиканың почетлы крайҙы өйрәнеүсеһе Әмир Сәйғәфәров, журналистар Салауат Мөхәмәтшин, Рәшит Үтәев һәм башҡалар үҙ йы­йынтыҡтарын даими сыға­рыуға өлгәште. Тимәк, Баймаҡ ижадсылары ла халҡы күңе­ленә юлды китап аша һала.
Башҡорт баҫмалары, биге­рәк тә нәфис әҙәбиәткә сар­саған халыҡ өсөн, Урал батыр бөрккән һыуһын ҡандырғыс тере һыуға тиң. Киләсәктә милли китаптарҙы һатыу эше тағы ла киңәйер, ҡала һәм район халҡының яратҡан урынына әүерелер, тип ысын күңелдән ышанабыҙ.