Бынан бер нисә йыл элек социаль селтәрҙәрҙең нимә икәнен дә белмәй инек, хәҙер иһә һәр кемдең тиерлек, йәшенә һәм ҡыҙыҡһыныуҙарына ҡарап, Интернетта шәхси бите бар. Ул ғына түгел, социаль селтәрҙәр – тормошобоҙҙоң айырылғыһыҙ өлөшө, аралашыу, танышыу, мәғлүмәт алыу, фекер бүлешеү, күңел асыу сараһы.
Маҡсаттары – кешеләрҙе таныштырыу, ҡыҙыҡһыныуҙарына ҡарап берләш­тереү, төрлө темаға аралашыу мөмкин­леге биреү, фото һәм видеоматериалдар менән бүлешеү, музыка тыңлау һәм башҡалар. Алыҫ­тағы дуҫтар-туғандар менән бәйләнеш булдырыу, араларҙы нығытыу йәһәтенән дә социаль сел­тәрҙәр ҙур әһәмиәткә эйә.
Уларҙың тәүгеләре Көнба­йыш илдә­рендә барлыҡҡа килгән. Иң таныл­ғандары – Facebook, Twitter, LinkedIn, XING, YouTube, MyAnimeList, Habbo Hotel, Google+, Tagged.com, Avaaz, Friendster һәм башҡалар.
Артабан уларға оҡшаш берләшмәләр Рәсәйҙә лә хасил булған. “Бәйләнештә”, “Класташтар”, “Минең донъям”, “Гайдпарк”, “Дуҫтар араһында”, “Сәләм”, “Минең әйләнәм” һәм башҡалар – ошо исемлектә.
Бөгөн социаль селтәр – тәүге сиратта онлайн аралашыу ҡо­ралы. Әлбиттә, арабыҙҙа уның аша аҡса тапҡандар ҙа, файҙа­лы эшмәкәрлек йәйел­дергәндәр ҙә, юҡ-бар шөғөл менән ваҡыт уҙғар­ғандар ҙа, шулай уҡ енә­йәтсел уйҙа кешеләргә виртуаль тоҙаҡ ҡорғандар ҙа юҡ түгел. Һәр хәлдә, социаль селтәр­ҙәр – асыҡ мөхит, уның менән ҡулла­нырғамы-юҡмы – үҙегеҙ хәл итәһегеҙ.