Былтыр Пенсияны берлектә финанслауҙың дәүләт программаһында ҡатнашыусылар үҙ иҫәптәренә 5,7 миллиард һумлыҡ иғәнә индергән. Быйыл майҙа дәүләт тарафынан ошо аҡсаға 5,5 миллиард һум өҫтәлде.
Финанслауҙың дөйөм күләме һәр саҡ иғәнәләр тупланмаһынан аҙыраҡ килеп сыға, сөнки йыл һайын тейешленән аҙыраҡ йәки күберәк түләүселәр осрай, ти белгестәр. Мәғлүм булыуынса, кешеләрҙең иҫәбенә йыл дауамында һалынған аҡсаны дәүләт кәмендә 2 һәм иң күп тигәндә 12 мең һум тәшкил иткән хәлдә генә “үҫтерә”.
Программала өсөнсө яҡ сифатында ҡатнашҡан эш биреү­селәрҙең иғәнәләре 2016 йылда 107,4 миллион һумға еткән. Был аҡсаға, әйткәндәй, дәүләт тарафынан бер ни ҙә өҫтәлмәй.
Үрҙә телгә алынған барлыҡ аҡсалар граждандарҙың шәхси иҫәптәрендә теркәлгән һәм туп­ланмаларҙың һаҡланыуын гарантиялау системаһына индерелгән идарасы компанияларға, дәүләт ҡарамағында булмаған пенсия фондтарына тапшырылған.
Барлыҡ пенсия тупланмалары һымаҡ уҡ, әлеге аҡса граж­дан­дарға хаҡлы ялға киткәс тә кире ҡайтарыла башлаясаҡ (йәшләй вафат булған осраҡта – уларҙың вариҫтарына). Уҙған йыл аҙағына ҡарата программала ҡатнашҡан 14,3 мең кешегә пенсияға сығыу менән бәйле 159 миллион һум түләнгән. Дөйөм алғанда, әлеге сара ҡулланыла башлағандан бирле берлектә финанслау программаһына ҡушылыу­сылар­ҙан 51,1 миллиард һумлыҡ иғәнә йыйылған, дәүләт ярҙамы 49,8 миллиард һумға еткән, эш биреүселәр 788,3 миллион һум күсергән. Шулай итеп, програм­маға ярашлы барлыҡҡа килгән пенсия тупланмалары 101,7 миллиард һумдан ашҡан.