Һөнәрленең ҡулы алтын, ти халыҡ мәҡәле. Йылым ауылында тыуып үҫеп, әле Баймаҡ ҡалаһында йәшәгән Денис Фәхретдинов хаҡында ла тап шулай әйтергә мөмкин. Йәш булыуына ҡарамаҫтан, оҫтаның ҡулында ҡорал уйнап тора, ағастан һырлап-юнып эшләгән әйберҙәре күҙҙең яуын ала. Ул — бәхетен үҙ төйәгендә булдырған йәш, тырыш ир-егеттәрҙең береһе.
Денис Ғәли улы тәбиғәттең матур ҡосағында урынлашҡан Йылым ауылынан. Тап ошо төбәктә ағастарҙың бөтә төрө үҫә: ҡарағас, ҡарағай, йүкә, имән, ҡайын, ерек... Бала саҡтан ошо ағастарҙан үҙенсә төрлө һындар, артабан юнып әйберҙәр яһарға яратҡан үҫмер, мәктәпте тамам­лағас, белемен Сибай педагогия колледжында дауам итә. Технология бүлегендә уҡыған сту­денттың ағас-һырлау ҡорол­ма­һында йыш булышыуын күргән уҡытыусыһы уға әйберҙәр яһау серҙәрен өйрәтә, төрлөсә кескәй генә йыһаздар эшләп ҡарау мөмкинлеге бирә. Ҡулына диплом алғас, артабан юғары белем эстәү ниәтендә Денис Сибай инс­титутына уҡырға керә. Ситтән тороп уҡыу бүлегенә күсеп, бер аҙ аҡса эшләп алыу теләге менән Себер тарафтарына юл ала. Шулай ҙа егеттең күңеленә үҙ эшен асыу уйы тынғылыҡ бирмәй. Баймаҡ ҡалаһы янынан ер алып, бәләкәй йорт ултыртып, янына бынамын тигән оҫтахана эшләп ҡуя. Себер­ҙәге аҡсаһына үҙенә кәрәкле станоктар һатып ала. Башҡортос­танда билдәле эш­ҡыуар, “Бай­маҡ” милли-һөнәр­селек үҙәге етәксеһе Вилүр Рәхимғоловта бер аҙ эшләп алыу мөмкинлеге була. Бында ул ҡурай яһау серҙәренә төшөнә. Яңы йорт төҙөүселәргә тышҡы биҙәлешен эшләргә ярҙам итешеп, тәҙрә биҙәктәре яһай.
Туғандары Денистың был хеҙмәтен хуплап ҡына ҡалмай, уға артабан шөғөлләнергә тәҡдим итә. Оҫта ҡуллы егет күңеленә яҡын эшенә тотона. Артабан Интернет аша заманса йыһаз эшләү серҙәре менән ҡыҙыҡһынып, махсус программалар аша үҙ оҫталығын арттыра. Уҡыуын тамамлап, ҡулына диплом ала.
Алда әйтеүемсә, ағасты ул тыуған яҡтарынан алып килә. Күбеһенсә кем нимә һорай, шуны эшләй. Ҡайһы ваҡыт һандыҡҡа ихтыяж күбәйә, икенсе осраҡта — йорт йыһаздарына. “Ҡурайҙы һораусылар бармы?” тигәнемә оҫта: “Һирәк”, — тип яуапланы. Баҡтиһәң, ситтә йәшәгәндәрҙең милли музыка ҡоралына ҡарата ҡыҙыҡһыныуы көслөрәк. Мәскәүҙә вахта ысулы менән эшләгән танышы, татар дуҫым һорай тип, унан һәр саҡ ҡурай алып китә икән. “Ҡурайҙы эшләү мәшәҡәтле, шуға уның менән һирәк ултырам, әммә заказ биреүсенең теләген яуапһыҙ ҡалдырмайым”, – ти оҫта.
Миҙгелгә ҡарап, заказдар төр­ләнә. Мәҫәлән, яҙ тәҙрә һәм ишек йөҙлөктәренә, беседкаға ихтыяж күбәйһә, көҙөн семәрле һандыҡ­тарға заказ биреүселәр арта. Эшләп өлгөр генә! “Һәр мебелде кешенең теләге буйынса һәм модаға яраҡлаштырып эшләргә тырышам. Хәҙер бит халыҡ заманса йәшәргә, йортон, ихатаһын нисек тә зауыҡлы итергә тырыша. Бигерәк тә аш-һыу, балалар бүлмәһе гарни­турҙары, компьютер, журнал өҫтәлдәре, һандыҡ, шкаф-купе кеүек йыһазды һорау­сылар күп”, — ти Денис Фәхрет­динов.
Бер яҡ ситтәрәк бойоғобораҡ торған һунар саңғыһына күҙем төштө. Уны ла оҫта үҙе яһаған. “Һунарға йөрөргә яратам, таныҡ­лығым да бар, күптән түгел мылтыҡлы ла булдым, шуға күрә үҙемә үлсәп, һунар саңғыһын эшләп алдым. Ҡышын йөрөнөм, оҡшай”, — ти ул.
Әйткәндәй, оҫта үҙ эшен йәйелдереү өсөн бер ниндәй дәүләт ярҙамы алмаған. Барыһы ла — үҙенең аҡсаһына һатып алынған станоктар, мебель эшләү өсөн кәрәк-яраҡ. Һуңғы ваҡытта йорт өсөн баҫҡыс эшләү отошло, хаҡы ла юғары, заказ биреүселәр ҙә байтаҡ, шуға күрә бер үк деталде күпләп сығара торған станок һатып алырға теләк ҙур, ти ул. “Ни өсөн субсидия юлла­майһығыҙ?” тигән һорауыма ул: “Белешкәйнем, бигерәк ҡағыҙ эше күп, әллә күпме документ юлларға кәрәк”, — тип яуапланы. Һаман беҙ рәсми ҡағыҙ тултырыуҙан, документ йыйыуҙан ары китә алмайбыҙ. Күп осраҡта үҙ эшен асырға теләгәндәрҙе тап ошо мәсьәлә туҡтата ла инде.
Бөгөн уңған, оҫта ҡуллы Денис кәләше Мәҙинә менән ҡаланың Көньяҡ биҫтәһендә үҙҙәренең йортон төҙөргә хыяллана. “Өйөм­дө лә заманға ярашлы итеп һа­лып, мебелде лә үҙем эшләйә­сәкмен. Эшеңдән ҡәнәғәтлек ки­се­реү – үҙе бәхет”, – ти ул.