“Башҡортостан” дәүләт концерт залында Бөйөк Еңеүҙең 72 йыллығына арналған тантаналы йыйылыш үтте. Мәҙәниәт һарайының фойеһында республиканың Милли музей хеҙмәткәрҙәре ойошторған бай күргәҙмә ғәрәсәтле йылдар, бөгөнгө тантананың ни тиклем ҙур юғалтыу, ҡорбан, ҡаһарманлыҡ аша бирелеүе хаҡында һөйләй. 112-се Башҡорт кавалерия дивизияһының байрағы, уның етәксеһе, легендар батырыбыҙ Шайморатовтың Хәрби Ҡыҙыл Байраҡ ордены, ҡытай телен өйрәнгән һүҙлеге... Йәнә ике тапҡыр Советтар Союзы Геройы Муса Гәрәевтең шәхси әйберҙәре… Музейға күптән түгел Рәсәйҙең Үҙәк архивынан үтә ҡиммәтле ҡомартҡыларҙың тапшырылыуы уның фондын тағы байытҡан.
Бер урында һалдат кәрәк-яраҡ­тары, каскалар, төрлө ҡорал өлгө­ләре урын алған. Ике яҡтан да үтәнән-үтә тишелгән каска Ленинград өлкәһендә табылған. “Тере хәтер” эҙәрмәндәр ойошмаһы илебеҙ азат­лығы өсөн баш һалғандарҙы асыҡ­лау, улар тураһындағы мәғ­лүмәтте йәш быуынға еткереү йәһәтенән ҙур эш алып бара.
Тантанаға олатайҙары менән балалар ҙа килгән. Ана, бер малай һәр әйберҙе тотоп-тотоп ҡарай, аяҡ кейеменә оҡшаған кескәй генә быяла һауыттың нимә булыуы менән ҡыҙыҡһына.
– Ҡара һауыты, улым. Һуғышта ошоға шыйыҡса һалып, ҡауырһынды шуға манып, хат яҙа торғайныҡ, – тип яуапланы олатаһы уға.
Ветерандарҙы ҡотларға республика Башлығы Рөстәм Хәмитов килгәйне:
– 9 Май – барлыҡ Рәсәй халҡы өсөн милли берҙәмлек һәм ғорурлыҡ көнө, – тине ул. – Ул беҙҙе олатай­ҙарыбыҙҙың һәм атайҙары­быҙҙың батырлығына, ныҡлығына лайыҡлы булырға саҡыра. Бөтә донъя, ил, беҙҙең ты­ныс­лыҡ өсөн йәнен аяма­ған хөрмәтле ветерандар, һеҙгә барлыҡ Башҡортостан халҡы исе­менән тәрән рәхмәтемде белдерәм.
Рөстәм Зәки улы был йылдарҙа Башҡорт­останда төҙөлгән хәрби час­тар, берләшмә­ләрҙең Мәскәү янында, Ленинград, Сталинград йүнәле­шендә, Курск дуғаһында һәм Днепр­ҙа, Белоруссияны, Балтик буйы, Европа илдәрен дошмандан азат итеүҙә ҡаһарманлыҡ күрһәткәнен хәтергә төшөрҙө. Яу яланында һәр икенсе һалдат башын һалған.
Тарихты оноторға ярамай. Әйт­кәндәй, Баш­ҡортостан илһөйәрлек тойғоһо тәрбиәләү, йәмәғәтселек эштәре һәм ирекмән берекмә­ләре күләме буйынса илдә иң алдынғы төбәк­тәрҙән иҫәпләнә. Шулай ҙа был йәһәттән республика Башлығы әүҙемерәк булырға, шулай уҡ ветерандар, ирекмәндәр отрядтарына, һуғыш булған урындарҙа, архивтарҙа эҙләнеү эше алып барған кешеләргә аныҡ ярҙам итергә саҡырҙы.
Тантана сәнғәт эшмәкәрҙәренең сағыу концерты менән тамамланды.