Меңәр быуаттар үтһә лә, һыу юлдары бер ерҙе икенсеһенә тоташтырыу, бер яҡтан икенсе киңлеккә сығыу мөмкинлеген биреү сараһын үтәй. Йылғалар аша заман талаптарына яуап биргән күперҙәр һалыу – бөгөн тотош илдең социаль һәм иҡтисади хәлен көйләүсе шарттарҙың береһе. Республика ерҙәренең Көньяҡ Урал тауҙарында һәм Көнсығыш Европа тигеҙлегендә урынлашыуы һәм 12 мең самаһы йылға, 2 700 тирәһе күл һәм быуа менән һуғарылыуын иҫәпкә алғанда, төбәк иҡтисадының тотороҡлоғо һыу ресурстарына ла бәйле булыуын күҙалларға мөмкин.
Уралтау һырттарының төнь­яҡ өлөшөнән башланғыс алып, дөйөм майҙаны 53,1 мең квадрат саҡрымды тәшкил иткән, 918 саҡрымғаса һуҙылған Ҡариҙел йылғаһы республика­быҙҙың төньяҡ райондары аша үтеп, Ағиҙелгә ҡоя.
Билдәле булыуынса, 2001 йылда Ҡариҙел ауылы билә­мәһендә Ҡариҙел йылғаһы аша понтон күпер файҙа­ланыуға тапшырылды.
Әммә ул йылына ике тапҡыр (ҡыш һәм яҙ айҙарында) һүтеп алынырға тейеш. Һөҙөмтәлә Ҡар­иҙел йылғаһы аша автотранспорт хәрәкәте ваҡытлыса туҡтатыла. Был ауыл халҡы өсөн ҙур ғына ҡатмарлыҡтар тыу­ҙыра. Етмәһә, ҡышҡыһын боҙ өҫтөнән йөрөү, яҙлы-көҙлө катер, паромдарҙа йөҙөү хәүеф­ле лә. Боҙ киткән осорҙа ауылға юл бөтөнләйе менән өҙөлөп тора. Район етәкселеге һәм ауыл халҡы был ҡатмарлы мәсь­ә­ләне хәл итеүҙе күпер төҙөүҙә күрә. Әммә проект ҙур сығымдар талап итә. Төҙөлөш­тө федераль һәм республика бюджеты иҫәбенә генә хәл итеп буласағы аңлашыла. Шуға ла мәсьәлә оҙаҡ йылдар “вәғәҙә­ләнгән” эштәр иҫәбендә генә ҡала килә.
Ниһайәт, 2013 йылда боҙ ҡуҙғала. Әлеге ваҡытта күперҙе төҙөү буйынса проект эштәренә 42 миллион һум күләмендә аҡса киткән. Ҡариҙел йылғаһы аша һалынасаҡ яңы күпер “Бөрө – Таҙтүбә – Һатҡы” автомобиль юлы төҙөлөшө проектына индерелеүе менән дә отошло.
Төҙөлөш эштәренең заказ­сыһы – Башҡортостан Респуб­ли­каһының юл хужалығы ида­ралығы. Объекттың дөйөм хаҡы – 1 млрд. 723 млн. 925 мең һум.
Төҙөлөш эштәре өс-дүрт йылға иҫәпләнгән. “Башҡорт­остандың 100 йыллығына – 100 объект” күләмле республика акцияһы сиктәрендә төҙөлгән күпер 2019 йылда файҙала­ныуға тапшырыласаҡ.