Башҡортостанда 300-ҙән ашыу кеше “Смарт-Тау” республика йәштәр белем биреү форумында ҡатнашырға теләк белдерҙе.
“Смарт-Тау” Өфөлә 27–29 апрел­дә уҙғарыла. Был форум белем алыуға, тәжрибә уртаҡлашыуға, фекерҙәштәр менән осрашыуға, төбәктә йәштәрҙең башланғыстарын үҫтереүгә йүнәлтелгән майҙансыҡты тәшкил итә. Бынан тыш, “Смарт-Тау” – “iВолга”, “Таврида”, “Мәғәнәләр биләмәһе” кеүек йәйге форумдарҙың грант конкурстарында проекттар менән таныштырыу мөмкинлеген дә бирә. Бында профессиональ тренер­ҙарҙың, сәйәсмәндәрҙең, йәмәғәт эшмәкәрҙәренең, ғалимдарҙың һәм эшҡыуарҙарҙың фекерен, баһаһын ишетергә мөмкин.
– Әлеге сара бөтә Рәсәй кимә­лендәге форумдар юҫығына инеү, үҙеңде күләмле кампанияла ҡатна­шыусы итеп тойоу мөмкинлеген бирә. Төп маҡсат – төбәк вәкил­дә­ренең тейешле кимәлдәге сығышын ойоштороу. Былтыр республика­быҙҙан ҡатнашыусылар проекттарын тор­мошҡа ашырыуға 3 миллион һумдан ашыу аҡса отто. Был – бик яҡшы һөҙөмтә. Муниципаль форум­дарҙы үҫтереү һөҙөмтәһендә тағы ла юғарыраҡ күрһәткестәргә өлгәшербеҙ, проекттарыбыҙ лайыҡлы баһа алыр, тип ышанабыҙ, – тине Башҡорт­остандың йәштәр сәйәсәте һәм спорт министры урынбаҫары Руслан Хәбибов.
Өфөләге эш йомғаҡтары буйынса иң яҡшы проекттарҙың авторҙары һәм иң әүҙем ҡатнашыусылар округ һәм федераль форумдарға юлла­насаҡ. “Смарт-Тау”ҙа үҙ проекты йәки идеяһы булған 18 йәштән 30 йәшкә тиклемге һәр кеше ҡатнаша ала. Ентеклерәк мәғлүмәтте “Бәйләнештә” селтәрендәге рәсми төркөмдән табырға мөмкин.