Бар тәбиғәт ҡышҡы йоҡо­нан уянған, урамдарҙа йырлап гөрләүектәр йүгергән апрель айында һеңлебеҙ Ғәҙилә Мөҙәрис ҡыҙы БҮЛӘКОВА матур ғүмер байрамын билдәләй.
Бөрйән районының Ҡыпсаҡ ауылында икеһе лә ғүмере буйы уҡытыусы булып эш­ләгән Рәхилә Ирназарова менән Мөҙәрис Ғәликәев­тәрҙең ишле, татыу ғаилә­һендә бишенсе бала булып донъяға килгән Ғәҙилә һеңлебеҙ бәләкәй сағынан бик зирәк, тырыш, үҙ һүҙен һүҙ итә торған сәмсел, ғәрсел, шул уҡ ваҡытта ғәмсел ҡыҙыҡай булды. Тәүҙә тыуған ауылыбыҙҙа 8-се, унан Бай­назарҙа урта мәктәпте тамамлағас, Башҡорт дәүләт университетының филология факультетында уҡыны. Бында ла һынатманы ул. Яҡшы уҡыу менән бергә, төрлө түңә­рәктәрҙә шөғөлләнергә лә ваҡыт тапты. Университетты уңышлы тамамлағас, уға СССР Фәндәр акаде­мияһының Өфө­ләге Тарих, тел һәм әҙәбиәт институтына йүнәлтмә бирҙеләр. Унда уҡып йөрөгәндә кейәүебеҙ, шулай уҡ фән кешеһе Илдус Ҡасим улы Бүләков менән ғаилә ҡороп, 35 йылға яҡын иңгә-иң терәп, бер-береһенә терәк-таяныс булып, матур тормош юлы үттеләр, улдары Илнурҙы тәрбиәләп үҫтер­ҙеләр.
Аспирантуранан һуң һең­ле­беҙ тәүҙә Тарих, тел һәм әҙәбиәт институтында, унан һуң БДПУ-ның башланғыс кластар факультетында эш­ләне. Ә инде 90-сы йылдар башында Сибай ҡалаһында юғары уҡыу йорто асылғас, ҡала хакимиәтенең һәм институт етәкселегенең саҡы­рыуы буйынса, Бүләковтар ғаиләһе Сибайға күсенде. Кейәүебеҙ Илдус Ҡасим улы институттың педагогика факультетында оҙаҡ йылдар декан булып эшләһә, Ғәҙилә 17 йылға яҡын башҡорт фило­логияһы кафедраһының алыштырғыһыҙ мөдире булды. Эшендәге уңыш­тары өсөн “БР-ҙың атҡаҙанған мәғариф хеҙмәткәре” тигән маҡтаулы исемгә лайыҡ булды.
Ғүмеренең төрлө осоронда бик ҡаты ауырыуҙар үткәрергә лә, юғалтыуҙар кисерергә лә тура килде ҡәҙерле кеше­беҙ­гә. Үткән йәй, бынан 10 йыл элек көслө инфаркт үткәргән кейә­үебеҙҙең һаулығы ныҡ наса­райғас, ҡасандыр уға операция яһалған Республика кардио­үҙәгенә яҡын булыу маҡса­тында, яңынан Өфөгә күсен­гәйнеләр. Тик Илдус кейәүҙең ғүмере һанаулы ғына ҡалған булып сыҡты... Бына шундай ауыр ваҡыт­тарында Ғәҙилә һеңлебеҙ ҡайғыһын Илнур улының ғаиләһенә, ейәне Айнурға һәм туғандарына – өс апаһына, ағай-ҡустыларына һәм улар­ҙың ҡасандыр үҙе уҡырға индергән, кеше булырға яр­ҙам итешкән бала-сағаларына баҫты.
Ҡәҙерле һеңлебеҙҙе, апа­йыбыҙҙы 60 йәшлек юбилейы менән ҡотлап, уға ҡоростай ныҡлы һаулыҡ, йән тыныс­лығы, яҡындарының ҡәҙер-хөрмәтенә төрөнөп, оҙон-оҙаҡ ғүмер кисе­рергә насип булыуын теләйбеҙ.

Әбйәлил районының Асҡар ауылында йәшәгән иң өлкән апаһы Ғәлиә һәм уның балалары – Гөлнара, Азамат Яхиндар, Айһылыу һәм Наил Мәғәфүровтар ғаиләһе.