ВИЧ-ты үҙенең тормош рәүеше һөҙөм­тәһендә йоҡторғандар менән бер рәттән, арабыҙҙа медицина учреждениелары хеҙмәткәр­ҙәренең аңһыҙлығы арҡа­һында ҡәһәрле ауырыуға тарығандар ҙа бар. Бындай хәл бик һирәк була (былтыр Рәсәйҙә ошондай 12 осраҡ теркәлгән, тип үрҙә әйт­кәйнек). Әммә ил тарихында Элиста, Дон­дағы Ростов ҡалаларында тиҫтәләрсә кешенең бер юлы ВИЧ йоҡторғаны тарихҡа инде.
Ошо ярайһы уҡ алыҫ ҡалаларҙағы күңелһеҙ ваҡиғаларҙың Башҡорт­останға ниндәй ҡағылышы бар, тиһегеҙме? Улайһа, тыңлағыҙ.
Үткән быуаттың 80-се йылдары аҙағында Башҡортостандан йәш ғаилә сабыйҙары менән диңгеҙгә ял итергә барған. Әммә яңы урында йәше лә тулмаған малай кинәт ауырып киткән, уны “Ашығыс ярҙам” менән Дондағы Ростов ҡалаһының дауаханаһына алып килгәндәр. Хәле ауыр булған бала төрлө дауалау процедуралары үткән, һауыҡҡас, ғаилә кире тыуған яғына ҡайтҡан...
Бәләкәстең ҡурҡыныс вирус йөрөтөүе бер аҙ һуңғараҡ осраҡлы ғына асыҡланған. Дондағы Ростовта, дауаханалағы медицина процедуралары ваҡытында был балаға ғына түгел, тағы бихисап сабыйға ауырыу йоҡтороу тарихы билдәле булғас, малайҙың яҙмышын Санкт-Петербургтың ВИЧ инфек­цияһы һәм СПИД мәсьәләләре менән шөғөлләнеүсе махсус үҙәге күҙәтеүгә алған. Ошо йылдар эсендә ул даими дауалана, табиптар ҡушҡан барлыҡ ҡағиҙәләрҙе үтәй.
Белгестәр әйтеүенсә, егет әле лә Сибайҙа йәшәй, белем алған, эшләп йөрөй. Ғаилә ҡорған, ҡатыны уның диагнозын белә. Һау бала тәрбиәләйҙәр (буласаҡ атай кеше – ВИЧ вируслы, ә әсәй һау осраҡта махсус процедуралар ярҙамында сирленең вирус көсөргәнешен кәметәләр; аталандырыу материалын сир компоненттарынан таҙар­талар һәм аналыҡҡа индерәләр).
Ошо егет миҫалынан сығып, табиптарҙың даими күҙәтеүендә тейешле дауалау алған осраҡта, сәләмәт тормош алып барғанда, эсеү-тартыу-наркомания менән мауыҡ­мағанда, ВИЧ инфекциялы кешеләр тиҫтәләрсә йыл йәшәй ала, тип әйтергә мөмкин.