Оло Ыҡтамаҡ ауылында Рәйес Әфләтүнов асҡан икмәкхана бына ете йыл инде район халҡын тәмле һәм хуш еҫле ризыҡ менән тәьмин итә. Бында тәүлегенә 1200 данаға тиклем ҡалас бешерелә, шулай уҡ бер нисә башҡа төр ашамлыҡ етештерелә.
Йүнсел үҙ маҡсатын тормош­ҡа ашырыуҙа ярҙамсылар итеп эш яратҡандарҙы, ҡушылғанды күңел биреп башҡарғандарҙы йәлеп иткән. Яуаплы һәм төп хәс­тәр, әл­биттә, икмәк беше­реү­селәр иңен­дә. Бында оҙаҡ йылдар хеҙмәт һалған Тәслимә Ғарипова менән Фатима Сә­ли­хова оло тәжрибәгә эйә. Күптән түгел хаҡлы ялға китеүселәрҙе алмаштырған Дания Заһитова менән Зилә Зәбихул­линаны үҙ һөнәре серҙәренә бик теләп өйрәтә оҫталар. Һәр йорт өҫтәлендә көн дә түрҙән урын ал­ған ризыҡтың ағын да, ҡараһын да, ондоң бойҙайҙан да, арыштан да тарттырылғанын бешерәләр бында.
Ризыҡтың һәр төрөн әҙерләү­ҙең үҙ нескәлектәре бар, тейешле технологик талаптар еренә еткереп үтәлә. Баҙар шарттарында баш­ҡаса эшләү мөмкин дә түгел. Продукцияның сифаты буйынса тикшереү­се­ләр ҙә, һатып алыусылар ҙә дәғүә йә ҡәнәғәт­һеҙ­лек белдергәне юҡ. Икмәк һәм башҡа ашам­лыҡ­тарҙы бер тәмләп ҡарағандар бында мотлаҡ икенсегә килә.
Кәштәләрҙең тиҙ арала бушауына ризыҡ хаҡтарының әллә ни тешләшмәүе лә йоғонто яһай. Эш­ҡыуарҙың “икмәк – төп ризы­ғыбыҙ, уны барыһы ла һатып алыр­лыҡ булырға тейеш” тигән һүҙ­ҙәре лә уның үҙ коллективы менән кешеләргә хеҙмәт итеүен күрһәтә.
– Райондың көньяҡ өлөшөн­дә, Әй буйында урынлашҡан ауыл­дарҙы, шулай уҡ бөтөнләй икенсе яҡта ятҡан Тәкә менән Абдулланы, республиканан ситтә лә киң билдә­лелек яулаған “Ҡарағай” шифа­ханаһын, шулай уҡ күпселек балалар баҡса­ларын һәм мәктәп­тәрҙе икмәк менән тәьмин итәбеҙ, – тип һөйләй Рәйес Рәмил улы. – Балаларға һәм уҡыусыларға махсус сертификат буйынса витаминлы ризыҡ бешерһәк, илебеҙҙең төрлө тарафтарынан “Ҡарағай”ға килеүселәр уның көрпәлеһенә өҫтөнлөк бирә.
Әйткәндәй, йүнсел үҙе Теләш ауылынан. Унда тиклем 25 саҡ­рымлыҡ юлдың әллә ни рәте булмаһа ла, яҡташтарын да онот­май: уларға ла тәмле икмәген көн дә алып барыуҙы яйға һалған.
Күрше Свердловск өлкәһенең Красноуфимск ҡа­лаһындағы техникумда механик һөнәрен үҙ­ләш­тереп, оҙаҡ йылдар машина-трактор оҫтаха­на­һын етәк­ләгән Рәйес Әфләтүновты тыуған тө­йә­гендә лә ыңғай яҡтан ғына телгә алалар. 2010 йылда иһә үҙ кәсебен асып, икмәк бешереүгә то­тон­ған. Тиҙҙән ул етештергән ашамлыҡ сифаты һәм тәме яғынан районда “иң яҡшы” тигән баһаға лайыҡ бу­ла, артабан эшҡыуар менән фекерҙәштәре был ки­мәлдән түбән төшмәй. Коллективтың балалар учреждениелары өсөн икмәк бешереү хоҡуғы биргән тендерҙарҙа даими еңеү яулауы ла – быға асыҡ миҫал. Башҡа төр тауар менән бер рәттән төп ри­зыҡ­ты ла һайлау мөмкинлеге ҙур булған баҙар иҡ­ти­сады шарттарында хеҙмәт емештәренең өҫ­төнлөк менән файҙаланыуы – Рәйес Рәмил улының икмәкханаһында эшләүселәргә халыҡ баһаһы ул.