80 йәшендә күренекле дәүләт һәм йәмәғәт эшмәкәре Данир Камалетдин улы Үзбәков вафат булды.
Д.К. Үзбәков 1936 йылдың 2 нояб­рендә Башҡорт АССР-ының Хәйбулла районындағы Оло Әбеш ауылында тыуған. Темәс педагогия училищеһын тамамлағандан һуң хеҙмәт эшмә­кәрлеген Матрай райо­нының Ҡәҙерша ете йыллыҡ мәк­тәбендә уҡытыусы булып башлай. Армияла булып ҡайтҡас, Хәйбулла районының Йән­теш ете йыллыҡ мәктәбендә уҡы­тыусы, унан һуң Хәйбулла район гәзитендә яуаплы секретарь булып эшләй. Ленинград Юғары партия мәктәбен тамам­лағандан һуң Д.К. Үзбәков КПСС-тың Башҡортостан Өлкә комитеты йүнәлтмәһе буйынса Балаҡатай район гәзитенә мөхәррир итеп ебәрелә, артабан КПСС-тың Балаҡатай райкомында пропаганда һәм агитация бүлеге мөдире, 1969–1982 йылдарҙа Башҡорт АССР-ы Министрҙар Сове­тының мәҙәниәт, мәғариф һәм һаулыҡ һаҡлау бүлегендә өлкән референт булып эшләй.
1982 – 1998 йылдарҙа Д.К. Үзбәков Башҡортостандың архив ведомство­һына етәкселек итә. 1982 йылдан 1991 йылға тиклем Башҡорт АССР-ы Министрҙар Советы ҡарамағындағы архив идаралығы начальнигы, 1991 йылдан 1995 йылға тиклем Башҡорт АССР-ы Министрҙар Советының Архив эштәре комитеты рәйесе, 1995 йылдан 1998 йылға тиклем Башҡорт­остан Республикаһының Архив эштәре буйынса дәүләт комитеты рәйесе була.
Коллективтың эшен оҫта ойоштороу һөҙөмтәһендә ҡыҫҡа ваҡыт эсендә архивтарҙың матди-техник базаһы һиҙелерлек яҡшыра, норматив-хоҡуҡи база барлыҡҡа килә, ғилми-нәшриәт эшмәкәрлеге әүҙем­ләшә. Башҡорт­остан тарихындағы мөһим осорҙар тураһында документтар йыйын­тыҡтары әҙерләнә һәм нәшер ителә. Уларҙың күбеһе архив ғилеме, документтар туплау һәм археография өлкәһендәге ғилми эштәр конкурстарында пре­мияларға һәм дипломдарға лайыҡ була.
Күп йыллыҡ тырыш хеҙмәте өсөн Данир Камалетдин улы Рәсәй федераль архив хеҙмәтенең, БАССР Юғары Советы Президиумының Почет грамотаһы менән бүләкләнә. Уға “Рәсәй Федерацияһының атҡаҙанған мәҙәниәт хеҙмәткәре”, “Башҡортостан Рес­публика­һының атҡаҙанған мәҙә­ниәт хеҙмәткәре” тигән маҡтаулы исемдәр бирелә.
Профессионал, оҫта етәксе, баҫал­ҡы һәм һоҡланғыс шәхес Данир Камалетдин улы Үзбәков хаҡында яҡты иҫтәлек беҙҙең йөрәктәрҙә мәңге һаҡланыр.
Р.З. ХӘМИТОВ, К.Б. ТОЛКАЧЕВ, Р.Х. МӘРҘӘНОВ,
В.А. НАГОРНЫЙ, И.А. ТАЖЕТДИНОВ, С.Т. СӘҒИТОВ, И.И. ЯЛАЛОВ,
И.В. ҒӘЛЛӘМОВ, Ә.Ә. ХИСМӘТУЛЛИН, Р.Х. ИБРАҺИМОВ,
М.Р. МИҢЛЕҒӘЛИН, В.М. ШӘРИПОВ.