Донъяла яҡшылыҡтан да бөйөгөрәк, юғарыраҡ нәмә юҡ. Кеше изгелек ҡылып ҡына йәшәргә тейештер. Ҡайһы саҡта иңдәреңә төшкән ауырлыҡтарҙы, һынауҙарҙы үткәндә лә һәр саҡ кемдеңдер ярҙамына мохтажһың. Күптән түгел Халыҡ-ара яман шеш менән сирле балалар көнө уңайынан тәүгә “Ғүмер тамсыһы бүләк ит” акцияһы уҙҙы. Уға республика Башлығы ҡарамағындағы Дәүләт-конфессиональ мөнәсәбәттәр буйынса совет булышлыҡ итте.
Ҡыҙғанысҡа ҡаршы, дүрт сирле сабыйҙың өсәү­һе генә тулыһынса һауыға. Был тәү сиратта ауырыу­ҙың бик һуң асыҡ­ланыуы менән аңлатыла. Илдә яман шеш сиренә дусар булған балаларҙың һигеҙ процентында ул тик һуңғы стадияла асыҡлана. Онко­логияның 200-ҙән ашыу формаһы бар. Бәләкәс­тәр­гә йыш ҡына лейкемия диагнозы ҡуйы­ла. Был ҡан­дың зарарланыуын аң­ла­та. Һөҙөмтәлә улар йылдар буйы дауаханала ятыр­ға мәж­бүр, күптәре уҡыуын ва­ҡытында тамамлай алмай.
Акция Өфөләге Республика ҡан тапшырыу стан­цияһында үт­те. Йәштәр ваҡытынан күпкә алдан килә башланы. Ҡан тапшырыр алдынан һәр кем табипҡа күренде.
“Рух” йәштәр хәрәкәте рәйесе Фәнис Абдрахманов әйтеүенсә, яман шеш менән ауырыу – ҙур бәлә.
– Ошо акцияны үткәреп, йәмғиәтебеҙҙе “йоҡонан” уятыр­ға теләнек. Эргә-ти­рәбеҙҙә күпме бала ауырый, уларға аҙмы-күпме ярҙам булһын тинек. Ал­лаһ Тәғәлә беҙгә шундай мөм­кинлек биргән: беҙ үҙ аяҡта­рыбыҙҙа йөрөйбөҙ, сәй эсәбеҙ, эшебеҙҙе баш­ҡарабыҙ. Шул шатлығы­быҙ­ҙы ауырыған балалар менән бүлешкебеҙ килде. Әлеге диагноз үлем тигән һүҙ тү­гел. Бөгөн был сирҙе еңеп була. Был көндө шулай уҡ “ышаныс көнө” тип атар инем. Ил тө­көрһә – күл була, тигәндәй, ошон­дай акциялар күберәк үтһә, беҙ ауырыуҙы еңәсәкбеҙ, – ти ул.

Айгиз БУРАНҒОЛОВ:
– Был хәйриә сараһы тура­һын­дағы хәбәрҙе шатланып ҡабул иттем. Сауаплы эшкә үҙемдең өлөшөмдө индерәйем тинем. Ҡыҙға­нысҡа ҡаршы, тән ауырлы­ғым нормаһы тап килмәү сәбәпле ҡан тапшыра алманым. Шулай булһа ла, кәйефем ҡырылманы, сөнки изге ғәмәл ниәткә ҡарап билдәләнә.
Таңһылыу БУЛАТОВА:
– М. Аҡмулла исемендәге Башҡорт дәүләт педагогия уни­вер­ситетының биология факультетында уҡып йөрөйөм. Берәй балаға саҡ ҡына булһа ла ярҙа­мым тейһен тигән уй менән килдем бында. Ошондай акциялар йышыраҡ ойошторолһа, күпме кешене ҡотҡара аласаҡбыҙ!
Дилә ҒӨБӘЙҘУЛЛИНА:
– “Баймаҡ йәштәре” берлеге менән “Рух” йәштәр хәрәкәте ағзалары ошо акцияға ҡушыл­дыҡ. Дуҫтарға, туғандарға, та­ныш­тарға хәбәр иттек. Гемоглобин кимәлен түбән тип таптылар. Кәйефем ҡырылды, икенсе ҡабат килермен тип һүҙ бирҙем.
Ислам БАЙҒУЖИН:
– Бындай саралар бик кәрәк тип һанайым. Яман шеш менән ауырыған балалар күп. Ҡулы­быҙҙан килә икән, ниңә ярҙам итмәҫкә?