Хөкүмәте йортонда йәш ғалимдарҙы тәбрикләнеләр. Ғилми эштәр конкурстары еңеүселәренә – 20 кешегә – республика гранттары тапшырылды. Быйыл аҡсалата бирелгән бүләктең күләме 90 мең һум тәшкил итте.
Ғилми эштәр конкурстары еңеү­селәренә диплом­дарҙы Хөкүмәт Премьер-министры урынбаҫары Салауат Сәғи­тов тапшырҙы. Ул йәш ғалимдарҙы һөнәри байрамдары — Рәсәй фәне көнө менән, шулай уҡ тик­шеренеүҙәге юғары ҡаҙа­ныштары менән ҡотланы.
— Бөгөн — Рәсәй фәне көнө, – тине Салауат Сәғи­тов. — 2030 йылда респуб­ликабыҙҙың көслө булыуын күрергә теләһәк, фәнде үҫтереү, йәш кадрҙарҙы әҙерләү мөһим эштәрҙең береһе булып тора. Баш­ҡорт­остан Республика­һының илдең алдынғы фәнни үҙәктәренең береһе булыуында һеҙҙең етди ҡарашығыҙ, хеҙмәтегеҙ баһалап бөткөһөҙ.
Салауат Тәлғәт улы бил­дә­ләүенсә, бөгөн төбәк етәк­селеге йәштәргә иҫәп тота, сөнки фән менән шөғөл­ләнгәндәр прогрес­тың этәргес көсө булып тора.
Йәш ғалимдарҙы кон­курс­та еңеү­ҙәре һәм гранттар алыуы менән шулай уҡ Башҡортостандың Фәндәр академияһы президенты Әлфис Ғаязов та ҡотланы.
— Республиканың үҙе­нең һәләтле йәштәргә ярҙам күрһәтеү системаһы бар. Йыл һайын Әҙәбиәт, сәнғәт, архитектура өлкә­һен­дәге дәүләт йәштәр премияһы, Фән һәм техника өлкә­һендәге дәүләт пре­мияһы, докторанттар, аспиранттар һәм студенттарға Башҡортостан Республи­каһы Башлығы стипендиялары тапшырыла, – тине ул. – Һеҙ башҡаларға үрнәк булып тораһығыҙ, ҡалған­дар ҙа һеҙгә эйәрер тигән теләктәмен. Бөйөк Карл Маркс: “Фәндә киң оло юл юҡ, арыу-талыу белмәйенсә уның тау-ташлы һуҡмаҡ­тарынан үрмәләгәндәр генә иң ҙур бейеклектәрҙе яулай ала”, – тигән. Уңыштар һеҙгә!
Башҡорт дәүләт аграр университеты аспиранты Ләйсән Мәмбәтова Грант­тың йәш ғалимдар өсөн бик яҡшы дәртләндереү сара­һы, үткәрелгән тикшере­неүҙәрҙең көнүҙәклеген раҫлаған мәртәбәле дәүләт ярҙамы булыуын билдә­ләне:
– Беҙҙең республиканың социаль-иҡтисади үҫешен­дә ғилем бик тә мөһим, шуға күрә белемдең һәм иҡти­садтың берләшеүе төбәге­беҙ һәм илебеҙ өсөн мөһим йүнәлеш булып тора. Ә был мәсьәләләрҙе хәл итеү өсөн Башҡортостанда бөтә мөм­кинлектәр бар.
Лайыҡлы наградаһын Нефтехимия һәм катализ институтының ға­лимдар коллективы ла алды.
— Балауыҙҙан төрлө мат­дәләр берләшмәһен айырып алыуға өлгәштек. Уларҙың нигеҙендә яман шешкә ҡаршы препараттар эшләү күҙаллана, – тине институт аспиранты Зарема Саҙретдинова.