Башҡорт дәүләт университеты менән Йәрмәкәй районы хакимиәте мәғариф һәм экотуризм өлкәһендә берҙәм проекттарҙы тормошҡа ашырасаҡ. Ике яҡ араһында ошо хаҡта тейешле килешеү төҙөлдө.
Документҡа ярашлы берҙәм тик­ше­ренеү эштәре алып барыласаҡ, белгес­тәр әҙерләү, уҡытыусылар, студенттар өсөн практика, стажировка мәсьәләләре буйынса хеҙмәттәшлек ойоштороласаҡ, дипломлы йәштәрҙең мәшғүллеген тәьмин итеү йәһәтенән аныҡ саралар булдырыласаҡ.
Етәкселәрҙең осрашыуында Йәрмә­кәй районы биләмәһендәге “Ҡолсом” спорт-һауыҡтырыу базаһында эко-агротуризмды үҫтереү мәсьәләһенә айырым иғтибар бүленде. Урында был йәһәттән күпмелер уңышҡа өлгәшелгән. Мәҫәлән, 2006 йылдан алып район ха­кимиәте һәм М.А. Шолохов исемендәге МДГУ-ның Өфө филиалы етәкселәренең башланғысы менән үҙенсәлекле мәғариф программалары, проекттары тормошҡа ашырылған. Улар араһында “Лингва” халыҡ-ара новаторҙар мәктәбе хаҡында айырым әйтеп китергә мөмкин. Инглиз телен тәрән өйрәнеү буйынса был программаны ғәмәлгә ашырыуҙа Ҡытай, Индонезия, Иран, Канада, Һиндостан, Италия, Колумбия һәм башҡа илдәрҙән халыҡ-ара тьюторҙар командаһы ҡатнашҡан. Ун йыл эсендә мәктәпте 500-ҙән ашыу бала тамамлап, сертификат алған. Күбеһе артабан инглиз теленә бәйле һөнәр һайлаған.
Этно-агротуризм буйынса “Экспедиция” халыҡ-ара проекты иһә ЮНЕСКО кафедраһы лаборатория­һы, Мәскәү асыҡ белем биреү институты, Мәскәүҙең Мәғариф департаменты, М.А. Шолохов исемендәге МДГУ-ның Өфө филиалы менән берлектә тор­мошҡа ашырылған. Төрлө яҡтан килгән балалар тематик смена барышында Башҡортостан­дағы халыҡтарҙың тарихын, мәҙәниәтен, йолаларын үҙләш­тергән, көнкүрешен яҡындан күргән.
Башҡорт дәүләт университеты менән хеҙмәттәшлек Йәрмәкәйҙәге комплекс өсөн яңы үҫеш мөмкинлектәре асасаҡ. Осрашыуҙа уҡыу йорто ректоры Николай Морозкин белдереүенсә, спорт-һауыҡтырыу базаһы йыл дауамында эшләй башлаясаҡ. Унда физика-математика, химия-биология йүнәлешендә, төрлө телдәрҙе өйрәнеү йәһәтенән профилле сменалар, студенттар өсөн күсмә семинарҙар, конференциялар ойоштороу планлаштырыла, шулай уҡ туристик маршруттар төҙөләсәк.
“Был килешеү райондың инфра­структураһын үҫтереүгә ҙур этәргес бирәсәк. Урындағы халыҡҡа яңы эш урындары булдырыласаҡ – шуныһы айырыуса мөһим, – тигән фекерҙә Йәрмәкәй районы хакимиәте башлығы Илшат Райманов. – Социаль хеҙмәт­тәшлек, һис шикһеҙ, педагогтарҙың белемен камиллаштырыуҙың, студент­тарҙы әҙерләүҙең сифатын күтәреүгә тос өлөш индерәсәк”.