Уҙған йыл аҙағында Өфө хакимиәте ҡала мәктәптәрендә туҡланыу сифаты нисек икәнен асыҡлау маҡсатында уҡыусылар һәм уларҙың ата-әсәләре араһында социологик тикшеренеү үткәргән. Унда 48 мәктәптең V – XI клас­тарында һабаҡ алған дүрт меңдән ашыу малай һәм ҡыҙ, шулай уҡ 45 белем усағына төрлө йәштәге балаларын йөрөткән өлкәндәр ҡатнашҡан.
Яуаптарҙан күренеүенсә, уҡыусыларҙың ҙур өлөшө (85,7 %) мәктәп ашханаһында туҡлана. Айырыуса ваҡ бәлеш, булка, ҡамырға төрөп бешерелгән сосиска оҡшай икән уларға. Шулай уҡ балаларҙың яртыһынан күберәге гарнирҙар­ҙан ҡәнәғәт икәнлеген әйткән, байтаҡ ҡынаһы һыйыр, ҡош, балыҡ ите ҡушылған аш-һыуҙы һайлауын белдергән. Сәйҙән бер кем дә тиерлек баш тартмай, ә бына һыу, һут кеүек эсемлек­тәрҙе әллә ни алмайҙар, ти. 31 проценттың фекеренсә, ашханала емеш-еләк күберәк булырға тейеш, 21 процент иһә һөт аҙыҡтарына өҫтөнлөк бирергә кәрәк тип һанай.
Дөйөм алғанда, уҡыусылар мәктәптә туҡ­ланыуҙың әлеге системаһына ыңғай ҡарашта. Уларҙың 60 проценты самаһы: “Беҙгә бындағы аш-һыу оҡшай”, – тигән. “Бигүк ҡәнәғәтлән­дер­мәй” тигән яуапты өстән бер өлөштән ишетергә тура килһә, 11 процент тирәһе бөтөнләй ризаһыҙлығын белдергән.
Ата-әсәләрҙең фекеренә килгәндә, уларҙың күпселеге балаларына мәктәп ашханаһында тәҡдим ителгән ризыҡтарҙың төрлө булыуын теләгән һәм: “Уҡыусыларға бер нисә аш-һыу араһынан үҙенә оҡшағанын һайлап алырға мөмкинлек тыуҙырһындар ине”, – тигән. Шул уҡ мәлдә өлкәндәрҙең 18,2 проценты балалар һайланмаҫҡа, ни бирһәләр, шуны ашарға тейеш тип уйлай. Йәнә биш процент иһә: “Беҙгә барыбер”, – тип кенә ҡуйған.