Һүҙем Балтас районының Имән ауылында тыуып үҫкән Фәнәүи Ирғәли улы Шәйбәков тураһында. Ул 1930 йылдың 12 апрелендә тыуа. Йәшләй етем ҡала. Унан инде 80 йәшлек атаһын, ғәрип апаһын ҡарау уның иңенә төшә. Егет ҡорона ингәс, ауылдағы мәктәп уҡытыусыһы Йәннәт Ғиззәтуллина менән тормош ҡора. 1951 йылда Фәнәүи армия сафына алына. Йәш килен өс айлыҡ сабый менән ҡайны йортонда ҡала.
Фәнәүи сержант дәрәжәһендә Грузияның Потп ҡалаһында хеҙмәт итә. Шунда машина йөрөтөргә өйрәнә, профессиональ водитель һөнәрен үҙләштерә, ә 1955 йылда хәрби хеҙмәтен тамамлап ауылға ҡайта.
Фәнәүи Ирғәли улы тураһында тормош иптәше Йәннәт апай бына нимәләр һөйләй: “Бик уңған, булдыҡлы кеше ине. Ауыл халҡы уны ихтирам итте. Ун биш йыл дауамында колхозда бригадир булып эшләне. Нәҡ шул йылдарҙа Ленин исемендәге колхоздың “Имән” бригадаһы юғары уңыштарға өлгәште”.
1955 йылда өй күтәрәләр. Шул арала ғаиләне тулыландырып, шатландырып икенсе улдары Хәнәфи донъяға килә.
Ул йылдарҙа Ленин исемендәге колхоз ҡеүәтле хужалыҡтар иҫәбендә була. Етәкселек иһә Фәнәүиҙең тырышлығын, йыйнаҡлығын тиҙ абайлай, һәм ниндәй ауыр участок бар, Шәйбәковты шунда ебәрәләр.
1959 йылдың апрель айында Фәнәүи Ирғәли улы КПСС ағзаһына ҡабул ителә. Үҙе йәшәгән дәүерҙә ауыл Советына күп тапҡыр депутат итеп һайлана. Нәҡ шул йылдарҙа Нөркә ауылында милли батырыбыҙ Салауат Юлаев музейына нигеҙ һалына. Ул музей бинаһын ремонтлауҙа, экспонаттар йыйыуҙа ла ҙур өлөш индерә. Үҙе гел генә: “Беҙ тарихта үҙ урынын алған халыҡ”, – тиер була.
Фәнәүи Шәйбәковтың тағын бер яҡты сифатын күрмәй мөмкин түгел: ул халыҡтың ышанысын аҡлай белде. Ҡайһы тармаҡҡа килә, унда күтәрелеш, тәртип һәм яҡшы һөҙөмтә күренә башлай. Мәҫәлән, ҡыҫҡа ғына ваҡыт эсендә колхозда 20 урынлыҡ гараж, Нөркә һәм Имән ауылдарында кирбестән клуб төҙөлә. Ауылда балалар баҡсаһы асыла, тирмән сафҡа инә. Уны маҡтап халыҡ “Фәнәүи – ул өс ауылға бер кеше” тип баһалаған. Күкрәген “В.И. Лениндың тыуыуына 100 йыл”, “Хеҙмәт батырлығы өсөн” миҙалдары биҙәй. 1973 йылда Ф. Шәйбәков “Коммунистик хеҙмәт ударнигы”, “Социалистик ярыш еңеүсеһе” билдәләре менән бүләкләнә.
Йәннәт Ниғмәтулла ҡыҙы менән өс ул тәрбиәләп үҫтерә. Береһе – педагог, икенсеһе – нефтсе, ә өсөнсөһө – эшҡыуар. Ата-әсәһенә оҡшап улар ҙа ҡулдарынан килгәнсә ауылға, районға ярҙам итеп тора. Үҙҙәре уҡыған мәктәпкә компьютерҙар, яңы парталар бүләк итеп, яңы йыһаздар менән тәьмин итеүгә ҙур өлөш индерҙеләр. Ауылыбыҙҙағы зыяратты ла кәртәләп ҡуйҙы уңған егеттәр. Һуңғы өс йылда “Һаумы­һығыҙ, ауылдаштар!” байрамын да улар үткәрҙе.
Аталары тураһында иһә улар бер тауыштан: “Атай беҙҙең өсөн өлгө булды. Иң яҡын кәңәш­себеҙ, ярҙамсыбыҙ, дуҫыбыҙ ине, кешелекле булырға ла өйрәтте. Ул беҙҙең хәтерҙә мәңге тере!” – ти.