Рәсәй автоһәүәҫкәрҙәре бензиндың “Евро-4” һәм “Евро-5” тигән төрҙәренә ғәҙәтләнеп өлгөрмәне, уларға алмашҡа яңыһы барлыҡҡа килде.
“Евро-6” тип аталған экологик йәһәттән юғары стандартлы бензинды “ЛУКОЙЛ” компанияһы етештерә баш­лаған. Йәмғиәт башлығы Вагит Алекперов яңыраҡ ошо хаҡта бел­дергән. “Был яңылыҡ – баҙар талабы, киләсәктә ошондай юғары сифатлы яғыулыҡҡа һорау ҙур бу­ласағы асыҡ күренә”, – тигән ул. Бен­зин тирә-яҡ мөхиткә зарарлы матдәләрҙе аҙ сығарыуы менән үҙенсәлекле.
Әйткәндәй, Рәсәйҙә 2015 йылдың 1 сентябренән “Евро-5” бензины менән һатып алыу­сылар тулы ҡе­үәткә тәьмин ителә башланы. “АвтоВАЗ” компанияһының “Kalina”, вездеход кеүек Европа илдәренә оҙатыу өсөн тәғәйенләгән ҡайһы бер өлгө­ләре бөгөндән үк “Евро-6” стан­дар­тына яраҡлаштырып етеш­терелә.
Рәсәйҙә сығарылған бензиндың 3,7 миллион тонна самаһы экспортҡа оҙатыла. Тап шуға ла сифатлы яғыулыҡҡа ихтыяж сит илдәрҙә ҙур буласаҡ, ти белгестәр. Әлегә Рәсәйҙә “Евро-6”-ны ҡулланыу буйынса бер ниндәй талап юҡ. Уның бер литры күпме торасағы ла билдәһеҙ. Нимә генә тимә, бензиндың хаҡы уға өҫтәлгән төрлө һалымдар менән билдәләнә. Әйткәндәй, ташламалар индерелә ҡалһа, бензиндың хаҡы башҡа маркаларҙан арзаныраҡ булыуы ла ихтимал.