Билдәле шағир Риф Мифтаховтың күптәргә таныш тос шиғыр юлдары бар: «Әсә мөхәббәте ҡояштан ҡайнар, йондоҙҙарҙан бейек, диңгеҙҙәрҙән тәрән бит ул!» Бындай сағыштырыу менән бәхәсләшеү ҡыйын, унан тыш, әсәләр иңенә бала бағыу ғына түгел, ир ҡарау, ғаилә мәшәҡәттәрен теүәлләү, етмәһә, эшләп тә йөрөү кеүек бөтмәҫ-төкәнмәҫ донъяуи вазифалар һалынған. Рухи мәркәзебеҙҙең һағында ла – әсәләр, улар милләт киләсәген тәрбиәләй, халҡыбыҙҙы данлар ул-ҡыҙҙарҙы бәпләй.
...Өфөнөң былай ҙа даланлы, күр­кәм урындары­ның береһе Конгресс-холл уғата яҡтырып, балҡып тор­ғандай күренде: ошо шаршамбыла бында республи­ка­­ның төрлө төбәк­тәренән 500-ләгән әүҙем ҡатын-ҡыҙ, уңған әсәләр йыйылды. Ноябрҙең һуңғы йәкшәм­беһендә билдәләнгән күркәм байрам – Әсә көнө айҡанлы, улар өсөн матур тантана ойошто­ролғайны.
Рәсми сығанаҡтар буйынса, әлеге көндә республикала ярты миллиондан ашыу (551,9 мең) балалы ғаилә бар, улар 850 мең бала үҫтерә. Ошолар иҫә­бенән, 46,3 мең ғаиләлә (8,4 процент) өс һәм унан да күберәк бала тәрбиәләнә. Был күрһәткес буйынса Баш­ҡортостан Рәсәйҙә Ады­гей Рес­публикаһы, Став­рополь крайы, Еврей автономиялы округынан ҡала дүртен­се урында.
Республика әсәләрен Баш­ҡортостан Башлығы исе­менән Хөкүмәт Премьер-министры урынбаҫары Салауат Сәғитов тәбрик­ләне:
– Донъяның барлыҡ дин­дәрендә лә төп ҡанундарҙың береһе булып әсәләрҙе ололау тора, – тине ул. – Из­ге яҙмаларҙа юҡҡа ғына, ожмах әсә­ләрҙең аяҡ аҫтында, тиелмәгән. Көндәлек мәшә­ҡәттәр араһында яҡын­дарыбыҙға йылы һүҙ әй­тергә, уларҙы ни тиклем яратҡаныбыҙҙы белдерергә онотабыҙ. Әсә көнө – ошоно төҙә­теүҙең бер сараһы.
Йыраҡ араларҙы яҡын итеп, байрам тантанаһына килгән Хәйбулла һылыуы Розалия ла “әсә” һүҙенең ни тиклем мөһим һәм баһалап бөткөһөҙ әһәмиәт­кә эйә икәнен үҙ миҫалында белә: ағалары-апалары ҡанат нығытып, һа­ры сәсле һылыу ҡыҙсыҡ үҫмер ҡорона аяҡ баҫҡан саҡта яҡындары бер-бер артлы донъя ҡуй­ған. Ярай апаһы ситкә типмәгән – Розалияны ҡаҡмай-һуҡмай ҡарап үҫтер­гән, тәрбиәләгән, үҙаллы тормошҡа аяҡ баҫтырған...
Бала саҡтың ауыр хәти­рәләре күптән инде офоҡ артында. Уның ҡарауы, бөгөн Розалия Шәрипованан да бәхетле кеше юҡ. Ире Марат менән дүрт балаға ғүмер биргәндәр, Сибай ҡалаһында гөрләтеп донъя көтәләр, йәмәғәт тормошонда әүҙем ҡатнаша­лар. Был моңло ғаиләне күптәр белә – барыһы ла йырлай, бейей, дәрт-дармандары ташып тора. Өлкән улдарына 18 йәш, ул армия сафына йыйына, 8, 5, 2 йәшлек бәлә­кәстәр мәктәпкә, баҡсаға йөрөй.
– Ирем – полиция хеҙ­мәткәре, үҙем Учалы тау-ба­йыҡтырыу комбинатының Сибай филиалында эшлә­йем. Тормо­шобоҙ бөтөн, уйҙарыбыҙ уртаҡ, Аллаға шөкөр. Ҡала хакимиәтенең иғтибарын тойоп йәшәйбеҙ, торлаҡ, ер участкаһы алыу, балаларҙы баҡсаға урынлаштырыу кеүек мәсьәлә­ләрҙе үҙ яйы менән хәл итә барабыҙ. Иң мөһиме – иҫән­лек-һаулыҡ булһын, ул саҡта кәйеф яҡшы, дәрт-дарман ташып тора, – ти Розалия Рәғип ҡыҙы.
Эйе, әсәйҙәр – йылытып-ҡурсалап, өй усағын һаҡла­ған йәшәү сығанағы, донъя­быҙҙың тотҡаһы. Һәммәбеҙ­ҙең балалары имен-һау, аҡыллы булып үҫһен, әсә­ләр­ҙең сикһеҙ хәстәре, күңел йылыһы сабыйҙа­рының изгелеге булып кире әйләнеп ҡайтһын.