Кино күрһәтеүсенең ярҙамсыһы булараҡ, 13 йәштән Ҡалҡан, Өргөн ауылы клубтарында эшләп, шаҡтай ҙур тәжрибә
туплап өлгөргән Фәнит Шаһиев 7-се кластан һуң һайлаған һөнәре буйынса уҡырға барырға уйлай. Ләкин шул йылдарҙа 8-се класты мәжбүри уҡытыу индерелә, һәм уға мәктәпкә йөрөүен дауам итеүҙән башҡа сара ҡалмай.

Шул ваҡытта мәктәп директоры Әхнәф Хөснөтди­новтың булышлы­ғында спорт залында балалар кинотеатры асыла. Етәксеһе итеп Фәнит Шаһиев һай­лана. Кассир вазифаһын да ул саҡта уҡыусылар үҙҙәре үтәй. Балалар был ят һәм ҡыҙыҡлы шөғөлдө шул тиклем яратып баш­ҡара. Хатта уларҙың кинотеатры шул йүнәлештә ойошторолған конкурста еңеү яулай. Һуңынан егет, күңеленә ятҡан һөнәре буйынса Бәләбәй ҡалаһында уҡып, ҡулына тик “бишле” билдәләре ҡуйылған диплом ала.
1967 йылда Социалистик Хеҙмәт Геройы Ғөбәй Фәт­ҡуллин, “Совет” кол­хозының партком секретары Ниғә­мәт Ғиззәтуллин ярҙамында төҙөлгән яңы клуб Һәйтәк ауылында үҙ ишеген аса. Мөдире итеп Фәнит Арыҫ­лан улын тәғәйенләйҙәр. Шул рәүешле йәш егет бер юлы киномеханик һәм мәҙәниәт йорто етәксеһе вазифаһын башҡара. Әрме сафында хеҙмәт иткәндә лә ул яратҡан һөнәренән айырылмай. Үҙен тик ыңғай яҡтан күрһәткән һалдат партия сафына ҡабул ителә. Ил алдын­дағы бурысын үтәп ҡайтҡас, ҡабаттан элекке һөнәренә тотона.
Һәр эш, ниндәй булыуына ҡара­маҫтан, баш­ҡарыусыһынан ихласлыҡ, ижади ҡараш, эҙләнеү талап итә. Ша­һиев иһә маг­нитофондың бик һирәк­тәрҙә генә булған заманына ҡарамаҫ­тан, Нурислам ағай Йәнги­зовтың шул йәшниген һорап ала һәм кино барышында таҫмаһына көйҙәр яҙҙыра. Урындағы радио аша көндөҙ ҙә, кисен дә көй яңғырай башлай. Ауылға ситтән килгәндәр өсөн был күренеш бигерәк ҡыҙыҡ тойола. Радио иһә халыҡ менән туранан-тура бәйлә­неш тотоуға бу­лыш­лыҡ итә. Был йәһәттән ғәҙәттән тыш хәлдәр мәлендә кешеләрҙе иҫкәр­теүҙә уның әһәмиәте ҙур була. Ауыл­даштарының юбилей, тыуған көндәрен дә радиоһы аша бәйән итә ул.
Киноға алдан килеүсе­ләргә лә айырым иғтибар бүлә. Уларға шахмат, шаш­ка уйнау мөмкинлеге булдырыла. Билет алырға аҡсаһы етмәгәндәрҙе лә күҙ уңынан ысҡындырмай. Ишек арты­нан үтеп-һүтеп йөрөгәндәрҙе клубҡа әй­ҙәй. Йыш ҡына хатта бушлай күрһәтә киноһын.
Ауылдағы берҙән-бер мәҙәни үҙәк күңел асыу сараларынан башҡа агро­техник уҡыуҙар урыны булып та хеҙ­мәт итә. Был йәһәттән ғәҙәттән тыш хәлдәргә бәйле өйрәнеү кинофильмдары күрһәтелә. Әүҙем киномеханик йәйге осорҙарҙа күсмә кино күрһәтеү эшмәкәрлеген дә ойоштора.
Тырыш хеҙмәте өсөн Фәнит Шәһиев Хеҙмәт Ҡыҙыл Байраҡ орденына, “БАССР-ҙың атҡаҙанған мәҙәниәт хеҙмәткәре” тигән маҡтаулы исемгә лайыҡ була.