З. Биишева исемендәге “Китап” нәшриәтендә ғалим Рим Янғужиндың “Революцияға тиклемге Рәсәйҙә башҡорттарҙың хужалығы” исемле китабы донъя күрҙе. Әйткәндәй, был фәнни хеҙмәт бер нисә тапҡыр нәшер ителә.
Яңыраҡ Ырымбур ҡалаһында Каруан­һарай тарихи-архитектура ҡомартҡыһы асылыуға 170 йыл тулыу уңайынан тантаналар булып үтте. Иҫән булһа, Рим Зәйниғәбит улы ошо байрамдың уртаһын­да ҡайнап йөрөр ине. 1996 йылда “Китап” нәшриәтендә Гөлназ Данилова менән авторлыҡта улар “Каруанһарай” тигән китап сыға­рыуға өлгәшкән. Унда мәшһүр башҡорт йорто асылыуға тиклемге бар тарих өйрәнелгән. Каруанһарайҙы төҙөү ниәтенән алып, төҙөлөш хаҡындағы материалдар, хәрби губернатор В. Пе­ровский­ҙың хәстәр­ле­ге, башҡорт халҡына булған яҡшы мөнәсә­бәтенең сағылышы булған рәсми хаттар, башҡорт шағирҙа­рының шиғырҙары урын алған. Бына был йыйынтыҡты ла Башҡортос­тан Рес­публикаһының 100 йыллығын билдә­ләү уңайынан яңынан нәшер иткәндә һис насар булмаҫ ине. Унда күпме рухи, документаль байлыҡ һаҡлана.
Ноябрь айында Рим Зәйниғәбит улының тыуыуына 75 йыл тула. Ул – та­рихҡа, башҡорт халҡының тарихын өй­рәнеүгә ғүмерен бағышлаған ғалим. Уның фиҙакәрлеге күптәргә өлгө. Р. Ян­ғу­жиндың һәр мәҡәләһе, моног­рафияһы ялан-тикшереү эштәренә нигеҙләнеүе менән ихтирамға лайыҡ. Яҙмаларында буш һүҙ һөйләү, бер фәнни эште күсереп, икенсеһенән йолҡоп алыу юҡ. Ул үҙ халҡының йәшәйешен өйрәнеп, донъя этногра­фияһы өсөн яңы, ҡыҙыҡлы донъя асҡан. Бөгөн уның монографиялары алтынға бәрәбәр. Һанап китһәк тә, моғайын, зыян булмаҫ (ниндәй телдә сыҡҡан, исемен шул телдә яҙам): “Караван-сарай”, “Этнический состав населения Башкортостана”, “Традиционный хозяйственный уклад башкир прош­лого столетия (до 60-х годов)”, “Изу­чение этног­рафии башкир в XX столетии”, “Этнография башкир”, “Хозяйство башкир дореволюционной России”, “Хозяйство и социальная струк­тура башкирского народа в XVIII – XIX вв.”, “Земледелие и земельные отношения у башкир в первой половине XVIII в.”, “Происхождение башкирского народа”, “Башҡорт ҡәбилә­ләре тарихынан”, “Башҡорт ырыуҙа­ры”, “Корен­ные народы России” (Ф. Хи­самитди­но­ва менән авторлыҡта).
Күреүебеҙсә, ғалимдың үҙенән һуң ерлекле материал нигеҙендә яҙылған бик күп ғилми эше ҡалған, улар уның ғилми ғүмерен оҙайта. Рим Янғужин – башҡорт этногра­фияһын ентекле өйрәнгән, уның яңы офоҡ­тарын асҡан ғалим.