Журналистарҙың Сочи ҡалаһында үткән ХХ Бөтә Рәсәй фестивалендә “Рәсәйҙең алтын ҡәләме” премияһы лауреаты, яҙыусы-сатирик Марсель Сәлимов Мәскәү нәшриәттәрендә баҫылған “Президент бесәйе” һәм “Тишекле таш” китаптарының исем туйын үткәрҙе. “Көлкө тирәләй” тип аталған сатира-юмор кисәһендә ул үҙенең әҫәрҙәрен уҡып ҡына ҡалманы, көлкө хаҡында тос фекерҙәрен дә әйтте.
Рәсәй Президенты Эштәр ида­ра­лығының “Дагомыс” комплек­сын­дағы ҡунаҡтар залына йыйыл­ған Журналистар күренекле баш­ҡорт сати­ри­гы­ның милли әҙәбиәт­те һәм мат­бу­ғат­ты үҫтереүгә ин­дергән өлөшөн юға­ры баһаланы. Рәсәй журналистар союзы секре­тары, билдәле урыҫ фель­е­тон­сыһы Вадим Рогожин бө­гөн­гө фельетонистика тураһында һөй­лә­гәндә, уның китабынан ҡыҙыҡ­лы миҫалдар килтерҙе. Ә Болгария журналистары союзы рәйесе Снежана Тодорова, Мар. Сәлим­дең София һәм Варна ҡалала­рын­да уҙған ижад кисәләрен иҫкә алып, уның шаян шиғырын урыҫ телендә уҡыны.
Де Ришелье исемен­дәге ха­лыҡ-ара конкурс лауреаты Марсель Сә­лимов быйыл Одесса ҡалаһында үткәрелгән беренсе Халыҡ-ара әҙәби олимпиадаға ла саҡы­рылғайны. Ижади ярыш йомғаҡтары буйынса, төрлө жанр­ҙа уңышлы эшләгән донъя кү­лә­мендә билдәле яҙыусылар Сергей Дзюба (Украина), Алекс Клас (АҠШ) һәм Наталия Мазаник (Мәс­кәү) менән бергә беҙҙең мил­ләттәшебеҙ ҙә әҙәби олимпиада чемпионы тип танылды. Был маҡ­таулы исемгә ул сатира-юмор өл­кә­һендәге ижади ҡаҙа­ныш­тары һәм әҙәбиәтте пропаган­далау­ҙа­ғы әүҙем эшмәкәрлеге өсөн ла­йыҡ булды.
– Журналистарҙың юбилей фес­тивале мин теләгәндән дә шәбе­рәк килеп сыҡты, – тине Мар­сель Шәйнур улы, алыҫ сә­фәр­ҙән ҡайт­ҡас. – Бындай форумдарҙа ҡат­нашыу минең өсөн төрлө тарафтан килгән ҡәләм­дәштәр һәм уҡыу­сы­лар менән күңелле күрешеү генә түгел. Был – респуб­ли­кабыҙ мәҙәниәте, әҙә­биәте һәм журна­листика­һының абруйын федераль дә­рә­жәлә күтәреү ниәтенән башҡа­рылған етди эш тә!