Үҙ эшен юлһыҙ һәм газһыҙ ерҙә теплица ҡороуҙан башлаған Альберт Шәрәфетдинов төбәктә иң яҡшы йәшелсә үҫтереүсе булып танылды. Ҡараттамаҡ ауылында йәшәгән йүнсел районда иғлан ителгән конкурстың “Йәшелсәселек буйынса иң яҡшы шәхси ярҙамсы хужалыҡ” номинацияһында еңеүсе булды. Уның миҙгел дауамында үҫтергән ҡыяр уңышы, һәр сутыйға уртаса бүлеп иҫәпләгәндә, ике тоннанан артып китә.


Бөгөн, әлбиттә, былай тип әйтеүе генә анһат. Юғары ҡаҙанышҡа килтергән тиҫтә ярым йылдан ашыу ваҡыт арауығында ҡыйынлыҡтарҙың күбеһе онотолған да инде.
Юрист дипломлы Альберт бер ни тиклем төрлө ойошмаларҙа һайлаған һөнәре буйынса эшләй. Етерлек хеҙмәт хаҡы алырына ышанысы бик тиҙ юҡҡа сыға. Оҙайлы кредит ярҙамында булһа ла йорт һалыу теләге лә алыҫтағы хыялға әйләнә.
2000 йылда тормошон ҡырҡа үҙгәрткән ҡарарға килә: йылы офисты ҡалдыра ла “Панакс” крәҫтиән хужалығына юллана. Оло теплицала ҡыш дауамында ҡыяр һәм помидор етештерә. Бар бурыстарҙы еренә еткереп башҡарыу өҫтөнә йәшелсә үҫтереү серҙәрен, маһирҙарҙың тәжрибәһен ныҡлап хәтер һандығына туплай. Етерлек хеҙмәт күнекмәһе, бер ни тиклем оҫталыҡ туплауын һиҙгәс, эштән бушатыуҙарын һорап ғариза яҙа. Дуҫ-иштәренең “газһыҙ, юлһыҙ ауылда нимә көткәнен аңлайһыңмы һин?” тигән киҫәтеүҙәре лә туҡтатмай маҡсатына ынтылған егетте.
Ул, бар тырышлығын һалып, уйында булған бизнес-планын тормошҡа ашырыр­ға тотона. Туғандарынан бурысҡа йыйған 100 мең һум аҡсаға таҡта һәм полиэтилен япма һатып алып, ҡуртымға бирелгән дүрт сутый ерҙә теплица ҡора, унда бер нисә мейес урынлаштыра. Туймазы урман хужалығы бүлгән диләнкәнән етерлек күләмдә утын ҡайтартҡас, эштәр әкренләп яйға һалына: тәүге яҙҙа уҡ фермер аҙнаһына һатыуға 300 килограмлап ҡыяр оҙата башлай. Был Ҡараттамаҡҡа илткән юлдарҙың рәтһеҙ, ауылға газ үткәреү мәсьәләһен оло кабинеттарҙа хәл итеүҙе көткән осор була...
— Шәхси ярҙамсы хужалыҡтың өҫтөн­лөгө – үҙ өйөңдә тороп, ғаиләң менән бергә һәм үҙең өсөн эшләүҙә, — тип күптән нығынған уй-фекерҙәре менән уртаҡлаша Альберт. — Быны ҡайһы берәүҙәр ынтыл­ған һәм тәү ҡарашҡа йәмле генә булып тойолған йылы офиста хеҙмәт бурыстарын үтәү менән бер нисек тә сағыштырып булмай.
Ә теге саҡта ауылға тиҙҙән “зәңгәр яғыулыҡ” киләсәген алдан белгән йүнсел үҙенең инде ун сутыйға еткән теплицаһына газ индереү өсөн техник шарттар эшлә­теүгә өлгәшә. 2004 йылда утын яғылған мейестәрҙең кәрәге бөтә.
— Тора-бара теплица майҙандарын 16 сутыйға тиклем арттырҙым, — тип дауам итә ауыл уңғаны. – Алдыбыҙға ҡуйған “бер сутыйҙан – ике тонна ҡыяр” тигән бурысты үтәргә тырышабыҙ. Бар эштәрҙе ҡатыным Әлфиә һәм улым Руслан менән башҡарабыҙ. Был мәшәҡәттәрҙә төпсөк Динарҙың да яҡын киләсәктә ныҡлы ярҙамсы буласағына шик юҡ.
Шәхси ярҙамсы хужалыҡта үҫкән ҡыяр күптән үҙ һатып алыусыһын тапҡан. Әүҙем фермерҙың йәшелсәһен күп йылдар инде йыйған көнөндә үк тулыһынса тиерлек Салауат эшҡыуарҙары күмәртәләп алып китә, ҡалғаны яҡындағы Октябрьский ҡалаһы баҙарына эләгә. Тәжрибәһе нигеҙендә ҡыярҙың күптәр яратҡан йомшаҡ һәм тәмле, шул уҡ ваҡытта сағыштырмаса тиҙ үҫкән “эстафета” һәм “атлет” сорттарына төп иғтибарын бүлгән йүнсел 8 Март — Халыҡ-ара ҡатын-ҡыҙҙар көнөндә йорт шарттарында алынған тәүге уңышын кибеттәргә оҙата.
Альберт Шәрәфетдинов тотороҡло уңыш алыу серҙәрен бер кемдән дә йәшермәй. “Улар былай ҙа билдәле инде, — ти ул, — температура тәртибен һәм ҡыяр үҫтереү технологияһын теүәл үтәү менән бергә тупраҡҡа мотлаҡ сифатлы органик ашлама индерергә кәрәк”.
Ун алты сутый ергә ун алты “КамАЗ”, үҙе әйтеүенсә, яҡшы сифатлы тиреҫ килтерә икән. Минераль ашламаларҙы бөтөнләй ҡулланмай, күптәр мауыҡҡан торфлы көршәктәрҙән, башҡа төрлө яйланмаларҙан да баш тартҡан. Киләсәктә полиэтиленға һәм таҡтаға киткән сығым­дарҙы кәметеү йөҙөнән теплицаһын тимер каркаслы итергә, япманың ныҡ­лырағын һәм сыҙамлырағын хәстәрләргә ниәтләй.
— Йорт ҡыярының тәме – минең бренд, — ти, ихлас йылмайып, ауыл фермеры. – Һатып алыусылар маҡтап бөтә алмай йәшелсәмде...
Күңел һалып башҡарылған эш емеше шулай булырға тейештер ҙә ул. Бигерәк тә райондың иң яҡшы шәхси ярҙамсы хужалы­ғында.